Santiago, 20 de outubro de 2020.- O deputado do Grupo Popular José Luís Ferro Iglesias salientou hoxe no Pleno do Parlamento que “Galicia foi a primeira comunidade autónoma de España en por en marcha un plan de reactivación dos sectores culturais, dotado con 26,4 millóns de euros”.
“Temos que conseguir que o acceso e a participación na cultura sexa completamente segura para o público, os artistas e os técnicos, e para iso os xestores están deseñando un plan de continxencia e de seguridade, xa que a pandemia fai que a situación sexa cambiante e obriga a modificar constantemente os protocolos de asistencia a cultura seguindo sempre as indicacións marcadas por sanidade”, indicou.
Ferro Iglesias lembrou que o Goberno galego “púxose a traballar desde o primeiro momento para que o impacto da pandemia nos profesionais e nas industrias culturais fose o menor posible”. En concreto, dixo que “fíxose baixo unha serie de principios e obxectivos: salvar o emprego cultural, incentivando o consumo e apoiando a actividade de profesionais e empresas; apoiar e deseñar novos formatos que permitan continuar a actividade cultural no novo contexto de seguridade sanitaria; e manter as estruturas empresariais e laborais do ámbito cultural”.
NOVOS RETOS POR DIANTE
“Por suposto que temos máis e novos retos por diante que debemos atender, e novas necesidades que valorar, como as programacións adiadas, a cultura segura e a cultura necesaria”, recoñeceu o deputado popular, quen engadiu que “traballamos porque sabemos que da cultura dependen en Galicia máis de 30.000 familias, porque creemos que a cultura galega define a nosa identidade e quen somos, e porque o acceso á cultura é un dereito esencial de todos os galegos”.
José Luis Ferro criticou a “teima dos grupos da oposición co Xacobeo” e subliñou que o Camiño de Santiago “é a gran autopista cultural de todos os tempos”. Neste sentido, apuntou que a través da segunda edición do programa O teu Xacobeo “apoiaremos máis de 220 actividades, das que unha gran parte son culturais”.
Para rematar, Ferro demandou a socialistas e nacionalistas que “prediquen co exemplo en Madrid, onde paralizaron a cultura e tiveron que facer un plan acuciados e obrigados polo sector cultural”.
