Santiago, 17 de xaneiro de 2022.- O Grupo Popular vén de rexistrar unha proposición non de lei a través da que se esixe ao Presidente do Goberno de España o cese do ministro de Consumo, Alberto Garzón, e unha rectificación inmediata das súas declaracións, nas que afirmaba que España exportaba carne de mala calidade procedente de animais maltratados.
“Esta non é a mellor forma de defender un sector que leva anos adaptándose aos novos estándares de sustentabilidade ambiental, benestar animal e calidade alimentaria, que da traballo a miles de familias e é unha ferramenta fundamental para loitar contra o despoboamento, o abandono da terra agraria e para previr incendios forestais”, sinalou a viceportavoz popular, Elena Candia.
Ao remate da reunión dos deputados do Grupo Popular, Candia amosou “a nosa preocupación polas consecuencias que as declaracións do ministro Garzón poden ter no noso sector da carne”. En concreto, explicou que en Galicia existen máis de 61.000 explotacións de carne e supéranse as 400.000 toneladas de produción. Ademais, a industria cárnica da emprego a máis de 4.600 traballadores, facturando máis de 1.400 millóns de euros ao ano.
“Consideramos que o ministro Garzón equivocouse gravemente con estas declaracións, demostrando unha gran ignorancia sobre o sector en Galicia, e causando uns graves problemas para o seu futuro”, afirmou a viceportavoz popular.
RECTIFICACIÓN INMEDIATA
A proposición non de lei rexistrada polo Grupo Popular esixe ao Presidente do Goberno de España unha rectificación inmediata das declaracións realizadas polo ministro de Consumo, así como o seu cesamento polos seus reiterados ataques a un dos sectores produtivos máis puxantes de Galicia, que leva anos mellorando os seus procesos para garantir a máis alta calidade alimentaria e o benestar animal.
Así mesmo, demándase ao Ministerio de Agricultura a posta en marcha dunha campaña nacional e internacional de defensa e apoio ao sector cárnico, de xeito que se minore os efectos que poidan ter as declaracións realizadas polo ministro Garzón neste sector.
“O obxectivo é que se recoñeza o gran traballo que realizan os milleiros de gandeiros e gandeiras, así como veterinarios e enxeñeiros agrónomos, para facer que o sector gandeiro cárnico se adapte ás novas esixencias regulatorias e sociais, en materia medio ambiental, de benestar animal e calidade e seguridade alimentaria, acadando os máximos estándares de calidade nestas materias”, apuntou Elena Candia.
