Santiago, 18 de xaneiro de 2017.- O Parlamento de Galicia aprobou esta mañá a proposición non de lei do Grupo Popular a través da que se solicita á Xunta de Galicia que convoque este ano unha nova orde de axudas que colabore coa importante labor que se está realizando polo asociacionismo veciñal en Galicia, co obxectivo de contribuír a mellorar a calidade da vida local e fomentar e dinamizar estas entidades veciñais.
O deputado popular Alberto Pazos lembrou que a convocatoria de axudas do pasado ano 2016, por un importe total de tres millóns de euros, “tivo un éxito indiscutible, recibíndose máis de 500 solicitudes e resultando beneficiarias máis de 300 entidades”. Neste sentido, lembrou que a orde financiouse con cargo a unha achega orzamentaria extraordinaria, como foi o Fondo de Superávit de responsabilidade, “pero o éxito da convocatoria nos leva a pensar que o Goberno galego debería tentar asumir unha nova orde de axudas con cargo a fondos propios”.
PARTÍCIPE DO CUMPRIMENTO DO DÉFICIT
“Deste xeito facíase partícipe ao asociacionismo galego das vantaxes derivadas do cumprimento por parte da Comunidade galega dos obxectivos de déficit, recoñecendo á sociedade civil os seus esforzos na consecución deses obxectivos”, sinalou Alberto Pazos.
Os beneficiarios destas axudas son asociacións de veciños, confederacións, federacións ou unións de asociacións de veciños de Galicia, comunidades de usuarios de augas debidamente inscritas no rexistro público correspondente, e asociacións de mulleres rurais.
OBXECTO DAS AXUDAS
O obxecto destas axudas era a realización de investimentos, tanto de obra como de equipamentos, en inmobles da súa titularidade ou con dereito de uso; camiños veciñais e traídas de augas veciñais, coa finalidade de mellorar a prestación dos servizos de interese veciñal.
“A outra premisa fundamental da orde era conseguir articular estas axudas a través dun procedemento moi sinxelo, que simplificase tanto a solicitude como a xustificación das axudas”, concretou o deputado popular. Deste xeito, reducíronse as esixencias documentais dentro das marxes que permite a lexislación, eliminando ademais a necesidade de aportación económica a realizar polas asociacións veciñais.
