O Pleno do Parlamento de Galicia aprobou hoxe a proposición non de lei do Grupo Popular, que non contou co apoio do PSdeG, a través da que se solicita ao Goberno de España a transferencia da competencia dos servizos de meteoroloxía e estudos oceonográficos, que virán acompañados das funcións, medios financeiros e materiais relativos para o desenvolvemento destes traspasos.
A viceportavoz do Grupo Popular, Paula Prado, explicou que a Constitución Española establece como competencia exclusiva do Estado o servizo meteorolóxico, “pero isto non é inconveniente para que Galicia reciba a súa transferencia, xa que no Estatuto de Autonomía de Galicia existe unha previsión sobre ‘as restantes materias que con este carácter e mediante lei orgánica sexan transferidas polo Estado’”.
“Polo tanto, se o Goberno central fai o que nunca adoita facer, ceder, hai marco legal para dita transferencia”, asegurou Paula Prado, quen afirmou que “Galicia vai seguir facendo unha posición firme de defensa dos seus intereses como comunidade autónoma, sen hipotecas, nin mediacións, nin obediencias, máis alá da que se lle debe ao pobo galego”.
AMPLIACIÓN DO TEITO COMPETENCIAL
Prado manifestou que “seguimos insistindo na ampliación do noso teito competencial naquelas materias que son de especial interese para Galicia, co obxectivo de mellorar a súa xestión”. Así, lembrou que “os últimos acontecementos ocorridos no territorio español por fenómenos meteorolóxicos adversos, así como os que ocorren habitualmente en Galicia, poñen de manifesto a importancia de ter información precisa sobre os cambios meteorolóxicos, ademais da potestade de poder activar alarmas, baseándose na proximidade dos servizos e a precisión aportada pola experiencia”.
Meteogalicia é unha unidade de observación e predición creada hai 24 anos, que na actualidade depende da Consellería de Medio Ambiente e Cambio Climático. “Estamos a falar dunha entidade científica de referencia a nivel europeo que ofrece cada día información precisa, rigorosa e de calidade ao conxunto da cidadanía, que conta ademais coas ferramentas e recursos necesarios para predicir e anticiparse a posibles efectos adversos dos distintos fenómenos meteorolóxicos”, concretou a viceportavoz popular.
Así mesmo, apuntou que Meteogalicia conta con 160 estacións meteorolóxicas espalladas por toda Galicia, fronte ás 52 da Axencia Estatal de Meteoroloxía, ademais de contar cun conxunto de equipamentos e cun radar que ofrecen datos sobre a situación en cada zona cada 10 minutos.
INVESTIGACIÓN SOBRE GALICIA DESDE GALICIA
Respecto da solicitude de transferencia dos estudos oceanográficos, Paula Prado sinalou que “queremos que a investigación neste ámbito referida a Galicia non se decida desde un despacho do Paseo da Castellana”. “Somos a principal potencia pesqueira de España e de Europa, polo que é lóxico ter a capacidade de emitir informes e facer estudos, e non que o teña que facer o Goberno central”, afirmou.
“Non ten sentido que territorios sen mar opinen sobre o noso mar, ao igual que ocorre coas políticas sobre a protección do lobo”, rematou.
