Santiago, 22 de setembro de 2020.- O Parlamento de Galicia aprobou hoxe a proposición non de lei do Grupo Popular a través da que se demanda ao Goberno de España a retirada da limitación das taxas de reposición do persoal do sistema sanitario público, permitindo ofertar todos os postos necesarios para poder actuar ante a pandemia da Covid-19.
“Trátase dunha vella reivindicación que se fai tanto desde este Parlamento como por parte do Goberno galego, que no caso de Galicia permitiría ofertar neste ano 3.500 empregos no sector sanitario público”, indicou a deputada popular Encarna Amigo.
“Nas actuais circunstancias de emerxencia sanitaria é imprescindible, máis que nunca, que o Estado elimine a taxa de reposición para que poidan ser ofertadas por cada comunidade autónoma todos os postos que sexan necesarios para cubrir as necesidades asistenciais que se están a demandar”, manifestou.
Encarna Amigo subliñou que a Comunidade galega, “no seu firme compromiso pola estabilización, mantivo anualmente e de maneira ininterrompida desde o ano 2012 as convocatorias anuais de ofertas públicas de emprego, esgotando a taxa máxima de reposición de efectivos autorizada pola lexislación básica orzamentaria, o que permitiu a incorporación de cerca de 6.000 profesionais con vínculo de fixeza ás institucións sanitarias galegas entre 2012 e 2019”.
“Aínda cando as taxas de estabilización e o incremento do 8 por cento para as comunidades que, como a galega, compren os obxectivos de déficit permitiron incrementar estes últimos anos o número de prazas ofertadas, isto non é suficiente nun contexto de falta de profesionais como o que temos, non só en Galicia senón en toda a Unión Europea”, apuntou.
A deputada popular lembrou que “a eliminación da taxa de reposición no eido da sanidade pública galega ten sido, e seguirá sendo ata a súa consecución, unha petición reiterada neste Parlamento nos últimos anos”. Así, referiuse ás proposicións non de lei aprobadas en 2017 ou 2019, pero tamén ás demandas realizadas directamente tanto polo Presidente Feijóo como polo conselleiro de Facenda ao Goberno central para que se elimine esta taxa de reposición.
?Nas actuais circunstancias de emerxencia sanitaria é imprescindible que o Goberno do Estado,o único que pode,elimine a limitación das taxas de reposición para ofertar todos os postos necesarios para cubrir as necesidades asistenciais,defende @EncarnaAmigoSER
Pleno do @Par_Gal pic.twitter.com/BuvpZHQw6p— GrupoPopularGalicia (@GrupoPopularGal) September 22, 2020
“Hoxe, máis que nunca, é fundamental desbloquear e eliminar esta taxa de reposición para poder combater entre todos esta nova realidade histórica que nos obriga a convivir cunha pandemia de características imprevisibles, que tanto sufrimento e dor está provocando en todo o mundo”, sinalou.
