Santiago, 12 de marzo de 2021.- O Parlamento galego aprobou hoxe a proposición non de lei do Grupo Popular, transaccionada co PSdeG, a través da que se rexeita o recollido na nova Lei de Educación respecto do profesorado técnico de FP e demanda ao Goberno central que negocie, no seo da Mesa estatal de Educación, unha solución para este profesorado dentro da nova Lei de formación profesional ou no futuro estatuto público docente.
“Esta decisión se ten descuberto como un erro tanto para o futuro profesional destes docentes como para unha formación de calidade para o alumnado”, sinalou o portavoz popular de Educación, Ovidio Rodeiro.
Na súa intervención, Rodeiro lembrou que “o Goberno de Pedro Sánchez aprobou unha nova Lei de educación que deixa nun corpo a extinguir a case o 65 por cento dos profesores técnicos de FP, anulando toda a súa carreira profesional”.
GRAVE ATAQUE Á FP
“É unha lei que supón un grave ataque á formación profesional porque non integra aos profesionais técnicos de FP que son licenciados no corpo de secundaria; tampouco poderán acceder ao corpo de secundaria os profesores técnicos que conten con diplomaturas universitarias ou equivalentes; nin aqueles profesores que obteñan o título de grao con posterioridade ao 19 de xaneiro deste ano; así como o profesorado interino e substituto nas listas, ao quedar este corpo a extinguir”, explicou.
Deste xeito, concretou que “so o 36 por cento do profesorado técnico de formación profesional reúne os requisitos para acceder ou ingresar no corpo de ensino secundario de acordo coa redacción desta nova lei, aprobada pola porta de atrás polo Goberno de Pedro Sánchez”.
Ovidio Rodeiro salientou “o impulso vivido pola formación profesional en Galicia nos últimos anos, alcanzando a cifra récord de 56.144 matriculados neste curso e conseguindo que o 92,5 por cento dos alumnos titulados conseguiron insertarse no mercado laboral aos seis meses de rematar os seus estudos”.
