Santiago, 30 de outubro de 2020.- O Parlamento de Galicia aprobou hoxe unha proposición non de lei, logo dunha transacción entre o Grupo Popular e os socialistas, a través da que se insta á Xunta a regular os criterios e o procedemento de adquisición e distribución de máscaras hixiénicas entre o alumnado dos centros educativos de Galicia no curso 2020-21, co obxecto de ofrecer garantías xurídicas, lograr axilidade na aplicación da medida e evitar desigualdades entre os potenciais beneficiarios.
O portavoz de Educación do Grupo Popular, Ovidio Rodeiro, subliñou que o Goberno galego, a través do protocolo de adaptación ao contexto da Covid-19 nos centros de ensino non universitario de Galicia para o curso 2020-2021, “leva repartidas arredor de 400.000 mascarillas entre o alumnado máis vulnerable e o persoal docente e non docente”.
REMANENTE E NOVA COMPRA CENTRALIZADA
Ademais, destacou que a Consellería “dispón neste momento dun remanente de 60.000 máscaras para cubrir posibles eventualidades que poidan xurdir nos centros, que serán enviadas previa solicitude e xustificación para atender as circunstancias”. De cara ao futuro, avanzou que tamén está previsto xestionar unha compra centralizada para adquirir máscaras de xeito que se cubran todas as necesidades ata o remate do curso 2020-2021.
Rodeiro asegurou que todas estas máscaras “se reparten entre o alumnado de familias con menor renda per cápita”, tomando como referencia aos estudantes beneficiarios das axudas de material escolar no curso 2020-2021, ou cun nivel de renda establecido para as familias con renda per cápita igual ou inferior a 6.000 euros, salvo o alumnado de educación especial no que non se ten en conta o nivel de renda.
Para rematar, o portavoz popular apuntou que a Xunta “está a dotar aos centros públicos dunha unha achega complementaria para gastos de funcionamento, que se destinará, preferentemente, ás actuacións derivadas da pandemia do COVID-19”.
Entre estas actuacións está incluída a adquisición de máscaras hixiénicas para o alumnado de ensino obrigatorio pertencente a familias con rendas baixas e o matriculado en educación especial; máscaras cirúrxicas para eventualidades; xel hidroalcohólico; equipamento para espazo de illamento Covid-19, como batas desbotables, máscaras cirúrxicas, mascaras FP2 ou pantallas; así como outras actuacións necesarias para facer fronte a pandemia sanitaria.
