Santiago, 1 de marzo de 2018.- O Parlamento de Galicia aprobou hoxe unha proposición non de lei do Grupo Popular a través da que se insta á Xunta a axilizar a construción da pasarela e o itinerario peonil e ciclista entre Agrela e Marineda no concello de A Coruña co obxectivo de que estea rematada neste ano 2018, ao tempo que demanda ao Concello para que actúe no seu ámbito competencial e dea continuidade á obra que executa a Xunta cara á cidade ao longo da Avenida de Arteixo.
O portavoz de Infraestruturas, Martín Fernández Prado, lembrou que a Xunta de Galicia ten identificado nove itinerarios no concello de A Coruña dentro do Plan de Sendas de Galicia. “Unha delas, e dunha especial relevancia polo seu carácter urbano, é a execución dunha pasarela nun treito da AC-552 que conecta a cidade coruñesa coa Costa da Morte”, concretou.
Esta actuación localízase nos primeiros 600 metros da AC-552, desde o seu inicio na glorieta Eduardo Diz López ata o cruce coa estrada da Deputación DP-3007 ou Rúa Newton, e suporá un investimento superior aos 1,5 millóns de euros. A conexión sería non só coa Avenida de Arteixo, senón coa rede de corredores verdes e sendas peonís preferentes que figuran tanto no Plan de Seguridade Viaria da Xunta como no Plan Xeral municipal.
ALTO GRAO DE URBANIZACIÓN
Fernández Prado explicou que esta zona “caracterízase polo alto grao de urbanización nas marxes da estrada e pola presencia de numerosos accesos á calzada e de varias interseccións conflitivas asociadas ás naves industriais e comerciais aquí instaladas”.
“A execución deste proxecto previsto pola Consellería de Infraestruturas e Vivenda permitirá a mobilidade transversal entre a zona comercial de Marineda e o polígono de Agrela, ao tempo que mellorará as condicións para a circulación peonil e ciclista neste punto de carácter urbano”, sinalou o portavoz popular.
Martín Fernández subliñou a importancia de que o Concello de A Coruña “apoie as obras que a Xunta quere facer na cidade”, ante o que apuntou a necesidade de que o Goberno galego tamén demande aos responsables municipais a realización das obras que son da súa competencia.
