Santiago, 4 de maio de 2017.- O Parlamento de Galicia aprobou hoxe, a instancias do Grupo Popular, unha proposición non de lei a través da que se solicita á Xunta que desenvolva material didáctico vinculado á cultura galega e, de xeito especial, ao Camiño de Santiago, para que sexa útil na aprendizaxe do galego fóra da Comunidade galega.
A deputada popular María Antón explicou que esta iniciativa ten como obxectivo que “a Xunta desenvolva unidades didácticas para aprendizaxe de galego por estranxeiros con aqueles elementos que son perfectamente identificables con Galicia, tanto da nosa cultura como da gastronomía ou do noso acervo histórico, social e festivo”.
MENCIÓN ESPECIAL AO CAMIÑO DE SANTIAGO
Neste sentido, apuntou que o Camiño de Santiago “merece unha mención especial, non só porque nestes momentos é o símbolo máis referencial de Galicia no mundo enteiro, senón tamén porque entorno ao Camiño pode desenvolverse o relato de Galicia cun amplo abano de ámbitos e posibilidades”.
“O Camiño é un elemento atractivo que hoxe en día ten un gran tirón social e cultural, e aglutina en torno a si a moita xente desexosa de vivir a experiencia de percorrelo, polo que pode ser ese gancho no que enraizar na cultura galega e na lingua galega”, salientou a deputada popular.
POSICIONAR AO GALEGO
María Antón lembrou que a Xunta “leva percorrido un intenso camiño na procura de posicionar a nosa lingua e a nosa cultura alén da Comunidade galega e particularmente no estranxeiro, contando hoxe en día con diversos canles de actuación para perseverar neste obxectivo”.
A modo de exemplo, citou a rede de centros de estudos galegos, a rede de institutos Cervantes ou o Instituto Vicente Cañada Blanch de Londres, “aos que deberíamos engadir os centros de ensinanza de Castela e León nos que se imparte a materia de galego, así como as Universidades doutras Comunidades Autónomas que forman parte da rede de centros de estudos galegos”.
“Esta iniciativa vai encamiñada a xerar máis recursos e renovar estes repositorios co fin de que, por unha banda, os nosos colaboradores teñan materiais suficientes para que lles sexa máis doado impartir ensinanzas de lingua e cultura galegas, e por outra banda, que aqueles que desexen achegarse ao aprendizaxe de galego atopen maiores facilidades”, explicou.
