Santiago, 9 de novembro de 2017.- O Parlamento de Galicia aprobou esta mañá, a instancias do Grupo Popular, unha proposición non de lei a través da que se demanda que a Xunta continúe a actual liña para combater o furtivismo no mar, introducindo na medida das posibilidades os avances que as novas tecnoloxías nos ofrecen, como é o caso dos drons, para as tarefas de vixilancia e control.
Así mesmo, e logo dunha transacción do Grupo Popular co Grupo Socialista, incorporouse a solicitude para que a Xunta axilice o pago das axudas para a contratación de vixiantes contra o furtivismo por parte das confrarías, e estude a viabilidade de aumentar a partida destinada a este fin.
OBXECTIVOS VARIOS
O portavoz do Mar, Carlos López Crespo, explicou que “a loita contra o furtivismo persegue varios obxectivos, entre os que figuran a defensa dos intereses dos profesionais, a protección dos recursos do mar, o incremento da produtividade dos bancos marisqueiros, a mellora da calidade de vida do sector e a mellora da imaxe dos produtos do mar de Galicia”.
López Crespo considerou “evidente” que a loita contra o furtivismo “é unha tarefa inxente que non pode ser abordada de forma unilateral por gardacostas”. “Consideramos que a coordinación de todos os medios dispoñibles é unha necesidade, máxime cando o propio furtivismo ven acompañado en moitas ocasións por fenómenos como a violencia contra o persoal de gardacostas ou a dificultade de realizar controis nas estradas”, apuntou.
Neste sentido, subliñou o reforzo na colaboración cos corpos e forzas de seguridade do Estado, así como coas policías locais e os gardapescas das confrarías de pescadores. “Pero debemos dar un paso máis e estudar a oportunidade que nos presenta a utilización das novas tecnoloxías para a vixilancia e control dos furtivos pola costa, en especial o uso de drons”, manifestou.
