Santiago, 25 de abril de 2018.- O portavoz de Infraestruturas do Grupo Popular, Martín Fernández Prado, defendeu hoxe no Pleno do Parlamento aproveitar o desenvolvemento da 2ª fase do Plan de Transporte Público de Galicia que está a levar a cabo a Xunta para estudar a viabilidade de estender a gratuidade do transporte público interurbano para os menores de 19 anos, contando para iso coa colaboración e implicación técnica e económica das deputacións provinciais.
Así mesmo, Fernández Prado solicitou daqueles concellos que teñen a obriga de dispoñer de transporte urbano e que non teñan activado aínda ningún tipo de bonificación para os mozos, que poñan en marcha as actuacións necesarias ao obxecto de lograr, no menor prazo posible, a extensión da gratuidade no bus urbano para os mozos menores de 19 anos, no marco do Plan de Transporte Metropolitano de Galicia, asumindo o seu custo.
No debate dunha proposición non de lei do Grupo Socialista sobre a implantación da Tarxeta Xente Nova, Martín Fernández agradeceu que esta iniciativa “supoña un recoñecemento aos plans impulsados polo actual Goberno galego en materia de transporte público por estrada”.
IMPLANTADO EN 65 CONCELLOS
En concreto, salientou que o Plan de Transporte Metropolitano e a Tarxeta Xente Nova están implantadas en 65 concellos de cinco áreas metropolitanas: A Coruña, Ferrol, Santiago, Lugo e Vigo. Así, na actualidade existen cerca de 43.000 usuarios da Tarxeta Xente Nova, que teñen realizado arredor de 2,6 millóns de viaxes gratuítas.
O portavoz popular lamentou que o transporte metropolitano en Vigo “estea funcionando sen o Concello de Vigo pola súa obstinación e negativa a incorporarse a este plan social, impedindo que os veciños de Vigo e de toda a súa área teñan as mesmas vantaxes que os veciños de A Coruña ou de Santiago”.
Deste xeito, Martín Fernández demandou dos deputados socialistas que “se apliquen directamente a súa receita e comecen polo Concello de Vigo para rematar coa discriminación que están a padecer na actualidade os mozos e mozas, e os veciños en xeral, desta área en comparación co resto de áreas metropolitanas de Galicia”.
