O PPdeG censura as pintadas en espazos públicos por parte do BNG e das súas organización “satélites” ao considerar que “o vandalismo non pode disfrazarse de activismo” e polo prexuízo económico que xera o feito de ter que empregar recursos públicos a limpar estes espazos “só porque os de sempre decidiron usalos como escaparate para propaganda política”.
A deputada autonómica e presidenta de Novas Xeracións de Galicia, Nicole Grueira, acusa directamente á organización Galiza Nova de “estar cruzando liñas vermellas” coa súa campaña de pintadas en espazos públicos “como se estes fosen da súa propiedade”. Pon como exemplo disto as pintadas que son visibles en numerosas rúas das vilas e cidades galegas.
“Esta forma de actuar non representa nin á maioría dos galegos nin especialmente á mocidade. Porque a ninguén representa alguén que rompe co respecto, a dignidade e a educación”, sostén ao tempo que defende que “o que é de todos non é de ninguén e menos para estragalo” .
Grueira insta ás xuventudes do independentismo galego a que fagan isto “nas súas sedes” e non nos espazos públicos “que pagamos e mantemos entre todos” e conclúe lamentando que haxa que empregar recursos públicos “que poderían investirse en cousas moito máis importantes” en limpar estas pintadas.
INICIATIVA NO PARLAMENTO GALEGO
Ante isto, os populares galegos levarán ao Parlamento de Galicia unha proposición non de lei para “rexeitar actitudes que buscan a apropiación dos espazos públicos mediante pintadas ou empapelados con símbolos e consignas de contido ideolóxico e partidista que representan actos vandálicos”. Uns actos que, argumentan, distan moito dunha “sociedade plural, libre, aberta, democrática e tolerante”.
Instan así a todas as forzas políticas a “non incorrer neste tipo de comportamentos e condenalos publicamente cando se produzan, asumindo a responsabilidade compartida na defensa do respecto institucional e do uso responsable dos espazos públicos”, xa que estes feitos “non constitúen unha forma lexítima de expresión política, senón actos que vulneran a legalidade e o respecto pola convivencia cidadá”.
“Estas actitudes proxectan unha mensaxe negativa á sociedade e especialmente á xuventude, á que se debe educar na participación política libre, respectuosa e construtiva, afastada da imposición e do pensamento único e sempre dentro do marco democrático e legal”, conclúen.
