O PPdeG advertiu hoxe que as emendas do PSOE á proposición de lei orgánica de traspaso da AP-9 a Galicia van «na dirección contraria á vontade dos galegos e galegas» e «rachan coa postura unánime que ata en catro ocasións manifestou o Parlamento autonómico».

A través do seu deputado nacional e vicepresidente segundo da Comisión de Transportes e Mobilidade Sostible no Congreso, Celso Delgado, os populares afirman que albergaban «esperanzas» de que o PSOE «cambiara a súa postura», pero, pola contra, lamentan que «finalmente mantivo os argumentos que xa utilizou na pasada lexislatura, opoñéndose frontalmente á transferencia da titularidade da AP-9».

«O socialismo, cun dobre discurso en Galicia e en Madrid, négase a traspasar a titularidade da autopista e pide que se manteña na Rede de Carreteras do Estado», lamentan desde o PPdeG ao tempo que critican tamén a Sumar que «a través das súas emendas pretende colar dúas disposicións que nada teñen que ver con esta importante cuestión».

Por último, os populares lamentan que isto sexa a «confirmación» de que «a influencia e o servilismo do BNG co Goberno de Sánchez unha vez máis non serviu para nada».

«Os seus acordos de investidura seguen sendo papel mollado e esta vez viuse como os seus socios presentaron emendas desnaturalizando a transferencia. Desde o PPdeG continuaremos loitando por unha AP-9 galega e sen peaxes», conclúe Delgado.