Santiago, 3 de decembro de 2019.- O portavoz do Medio Rural do Grupo Popular, Moisés Blanco, afirmou hoxe no Pleno do Parlamento que o Goberno galego está a elaborar un Plan estratéxico integral para a formación no ámbito agrario, gandeiro e forestal, dirixido a potenciar estes sectores produtivos galegos a través dun relevo xeracional profesional e formado.
Moisés Blanco indicou que o Centro de Investigacións Agrarias de Mabegondo “é unha peza fundamental do sistema de investigación agraria de Galicia, xunto co Centro de Investigacións Forestais de Lourizán, a Estación de Viticultura e Enoloxía de Galicia (Evega) en Leiro e o Laboratorio Agrario e Fitopatolóxico de Galicia (Lafiga), unha estrutura complementada cos seis centros de formación e experimentación agraria de Galicia (Sergude, Guísamo, Becerreá, “Pedro Murias” de Ribadeo, Monforte de Lemos e Lourizán)”.
Na súa intervención no Pleno, o portavoz popular lembrou que a Axencia Galega de Calidade Alimentaria (Agacal) “incrementará o vindeiro ano un 43 por cento o investimento para I+D+i agrario, forestal e gandeiro galego”. Ademais, aumentarase un 30 por cento o investimento desta axencia nos centros de investigación de Mabegondo, Lourizán, Evega e Lafiga; así como un 6,36 por cento os gastos de persoal.
