31 de xaneiro de 2023. O Partido Popular de Galicia comprométese a que, tanto desde os programas electorais como desde os concellos, seguirá defendendo a importancia de formar parte da Unión Europea e aproveitar as grandes oportunidades que Europa ofrece “para crecer e seguir sumando” e, ao mesmo tempo, defender as prioridades e necesidades de cada territorio.

Así o manifestou esta mañá en Bruxelas a secretaria xeral do PPdeG, Paula Prado, durante a visita realizada á sede do Parlamento Europeo acompañada por unha delegación de máis dunha vintena de representantes da formación. A comitiva estaba composta por deputados nacionais e autonómicos, representantes municipais e membros das diferentes comisións sectoriais do PPdeG.

“Vimos a Bruxelas a interesarnos por decisións que está a adoptar a Unión Europea sobre temas que afectan directamente a Galicia”, indicou Paula Prado antes de citar cuestións como o veto á pesca de fondo, as axudas vinculadas á PAC, o impulso do Corredor Atlántico Noroeste “liderado por Alfonso Rueda xunto a outras comunidades autónomas” ou a política de protección ao lobo que “tanto está a prexudicar aos gandeiros galegos”.

“O que queremos é que se escoiten as nosas reivindicacións e ao mesmo tempo poñer de manifesto as oportunidades que nos ofrece Europa. Porque somos un partido europeísta que defende a Unión Europea, pero tamén queremos que a Unión Europea sexa consciente da realidade de Galicia e visualice como afectan as súas decisións ao noso territorio”, engadiu neste sentido.

En declaracións aos medios tras reunirse coa portavoz do Partido Popular no Parlamento Europeo, Dolors Montserrat, e co eurodeputado galego Francisco Millán Mon, a secretaria xeral do PPdeG quixo facer referencia ao veto á pesca de fondo insistindo en que “é unha decisión errada que está a prexudicar a moitas familias que viven deste tipo de pesca que non afecta en absoluto nin ao medio ambiente nin ao fondo mariño”.

Reivindicou neste sentido a importancia de adoptar decisións “con seriedade, con rigor, e cos informes na man” en contraposición á “filosofía ecoloxista radical” doutras formacións e que, en opinión de Paula Prado, nada ten que ver coa realidade galega.

A secretaria xeral dos populares galegos non dubidou en criticar ademais a mala xestión dos fondos europeos que está a levar a cabo o Goberno de Pedro Sánchez: “Non están a chegar realmente ao territorio”. Motivo polo cal pediu á Unión Europea unha actitude “vixiante” como a que o PPdeG mantén desde o Parlamento e desde as Cortes Xerais, xa que eses fondos “son fundamentais para a implantación de empresas, a xeración de emprego e a fixación de poboación no rural”.

MILLÁN MON: “GALICIA É A PRIMEIRA REXIÓN PESQUEIRA DE EUROPA”

Pola súa banda, o eurodeputado galego do Partido Popular, Francisco Millán Mon, subliñou a importancia da Unión Europea para Galicia, desde a adhesión de España fai xa case catro décadas: “Ademais dos Fondos Europeos que facilitaron nas últimas décadas a economía galega, os sectores máis relevantes de Galicia están fortemente influenciados pola lexislación e as políticas europeas”.

Facendo referencia ao futuro da pesca en Europa tras as medidas adoptadas pola Comisión Europea nesta materia, reivindicou que Galicia é a primeira rexión pesqueira de Europa. “A cadea mar-industria é un actor fundamental na economía galega. A pesca desempeña un papel crucial nas comunidades costeiras do continente europeo e é un actor crave na produción de proteína animal da máis alta calidade e coa menor pegada de carbono”, engadiu.

O eurodeputado galego —e presidente do Intergrupo Patrimonio cultural europeo, Camiño de Santiago e outros roteiros culturais europeas— tamén destacou a importancia da contribución dos Camiños de Santiago para o xurdimento dunha identidade europea e a formación dunha cultura europea común, por encima dos límites rexionais e nacionais. “Os Camiños constitúen o primeiro Roteiro Cultural Europea desde 1987. Así o recoñeceu o Consello de Europa. Este recoñecemento é testemuño do estreito vínculo do Camiño e a integración europea”, sinalou.

XORNADA DE ENCONTROS SECTORIAIS

Ao longo da xornada desta mañá, os representantes das comisións sectoriais do PPdeG tiveron a oportunidade de reunirse con políticos comunitarios para abordar asuntos en materia de pesca, asuntos exteriores, fondos europeos, economía, industria, infraestruturas, transportes, medio rural e medio ambiente.

Concretamente foron recibidos pola vicepresidenta da Comisión de Desenvolvemento Rexional, Isabel Benjumea; pola presidenta da Delegación para as Relacións cos Países da Comunidade Andina e membro da Comisión de Industria, Enerxía e Telecomunicacións, Pilar del Castillo; por Pablo Arias, membro da Comisión de Mercado Interior e Protección do Consumidor; e por Juan Ignacio Zoido, membro da Comisión de Comercio Internacional e da Comisión de Agricultura e Desenvolvemento Rural.

Pola tarde, a delegación do PPdeG realizará unha visita á Oficina da Fundación Galicia Europa en Bruxelas, onde os representantes galegos do Partido Popular terán a oportunidade de coñecer en profundidade o labor desta organización.