24 de marzo de 2023. A deputada do Grupo Popular Felisa Rodríguez reiterou hoxe no Parlamento de Galicia “o compromiso da Xunta de construír un novo pavillón para a práctica deportiva no instituto Ferrol Vello”, para o que urxiu ao Concello a poñer a disposición da Consellería a parcela necesaria para esta nova instalación.
Neste sentido, criticou que “tanto ao PSdeG como ao BNG non lles preocupe o alumnado, o persoal docente nin o persoal non docente, porque o único que lles preocupa é sacar rédito partidista a unha deficiencia que depende exclusivamente dunha decisión dos responsables municipais”.
No debate esta mañá no Parlamento galego dunha proposición non de lei a través da que se pide á Xunta o inicio inmediato das obras para dotar dun novo pavillón deportivo ao IES Ferrol Vello, que saíu aprobada cos votos do Grupo Popular, a deputada popular sinalou que PSdeG e BNG “saben perfectamente que o primeiro paso para que esta obra sexa unha realidade é que o Concello poña a disposición da Xunta os terreos necesarios, algo que o propio director do centro xa solicitou nun Pleno municipal”.
PLENAMENTE CONSCIENTES DO PROBLEMA
Neste sentido, apuntou que “no momento no que a Xunta dispoña destes terreos, a Consellería poderá botar man de partidas orzamentarias para levar adiante o proxecto e a obra”. Felisa Rodríguez criticou que “a urxencia amosada hoxe por PSdeG e BNG contrasta coas emendas que presentaron no seu momento aos orzamentos da Xunta para 2023, onde non recolleron partida algunha para a construción deste pavillón”.
“A Consellería é plenamente consciente do problema que ten o alumnado deste instituto ferrolán para o desenvolvemento da materia de educación física, xa que está a investir anualmente arredor de 15.000 euros en transporte para que estes estudantes poidan desprazarse ás instalacións municipais da Malata”, apuntou.
Así mesmo, a deputada popular considerou “un disparate” a proposta do PSdeG de cubrir o patio do IES Ferrol Vello, “un espazo que está totalmente rodeado de edificios e que deixaría ao centro sen un lugar ao aire libre para goce dos alumnos”.
“O IES Ferrol Vello terá o pavillón que se merece e que precisa, porque o compromiso do PPdeG está presente e non vai decaer”, manifestou Felisa Rodríguez, quen reiterou que “o Concello de Ferrol debe adquirir os terreos necesarios e poñelos a disposición da Xunta, para que a partir do mes de maio, cun novo goberno municipal responsable e de feitos e solucións, sexa realidade esa nova infraestrutura para o deporte neste instituto”.
