A secretaria xeral do Partido Popular de Galicia, Paula Prado, afirma que a Súa Maxestade “volveu deixar claro onte que non hai ninguén por riba da Constitución nin das institucións españolas”.
“O discurso de Felipe VI foi máis acaído que nunca nuns momentos nos que temos que reivindicar que somos maioría os galegos e galegas que compartimos os valores constitucionais nos que se fundamenta a democracia española”, engade.
Prado cre que a intervención subliña, unha vez máis, “a responsabilidade de construír pontes e non de rompelos en pedazos, e a importancia de unir lazos e non de deterioralos”.
“Felipe VI volveu demostrar que é o Rei que os españois merecemos e necesitamos. É o garante da Monarquía como a institución na que se sustentan as pontes sobre as que camiñou España durante os últimos 40 anos; e a institución que une os lazos dos que nos sentimos parte dun proxecto común a todos como é España”, sinala.
A secretaria xeral considera que “nestes tempos de partidos que chaman a rachar coa Constitución e cos valores que consagra” e dun Goberno “refén duns socios que só aspiran a romper España e deteriorar as institucións”, é momento de reivindicar o sentir da maioría.
“Somos maioría os que nos sentimos orgullosos da Monarquía e dos valores que representa e propugna; os que cremos en España, na fortaleza do modelo autonómico e na Unión Europea; e os que nos sentimos orgullosos das nosas institucións, da nosa Constitución e da súa vixencia; e como non, do espírito de concordia do 78”, abunda.
Lembra as palabras do presidente Alfonso Rueda sobre o discurso, expresadas a pasada noite nas redes sociais: “Galicia seguirá comprometida, sen fisuras, coa convivencia e co interese xeral”.
“Desde o PPdeG agardamos que Pedro Sánchez tomara nota das palabras do Rei, porque mellor nos iría aos galegos e a todos os españois se Sánchez escoitara máis a Felipe VI e escoitara menos a Rufián, a Junqueras e a Otegi”, conclúe.
