Comparece en rolda de prensa en Santiago xunto ao secretario executivo do PP no Exterior, Antonio Rodríguez Miranda
A secretaria xeral do PPdeG, Paula Prado, afirmou que os Presupostos Xerais do Estado presentados polo Executivo central esta semana demostran que os galegos non son unha prioridade para o Goberno de Pedro Sánchez, cuxos ministros visitan a Comunidade “case a diario” para “traer insultos”. “Adianto que así será o ano 2023: un ano de moitos insultos, pero de nulos investimentos a Galicia”, subliñou.
Como indicou, as Contas públicas estatais “non teñen en conta a Galicia” e non atenden ás propostas da nosa Comunidade como si se fai coas de Cataluña. “Sánchez beneficia unha vez máis aos seus socios. Os Presupostos Xerais do Estado volven ser os Presupostos Electoralistas do Estado, nos que vale máis quedar ben con independentistas e separatistas que con Comunidades fieis como a nosa”.
Igualmente, sinalou que se trata duns orzamentos que non son “de verdade”, con “cifras infladas e fume para Galicia”, criticando que, ademais, hai partidas que nin sequera aparecen —a saída sur de Vigo, a modernización do tren Ferrol-Coruña ou o AVE por Cerdedo— nin “tampouco veremos en 2023 o inicio das autovías Vigo-O Porriño, da Mariña, Lugo-Ourense ou Ourense-Ponferrada”.
“Os Orzamentos Xerais máis expansivos da Historia son uns Orzamentos retraídos para a nosa Comunidade”, dixo explicando que estancan o investimento, baixan ata o 8% o noso peso estatal —co Goberno de Rajoy chegouse a alcanzar case o 14%— e incorporan partidas que “sabemos de sobra que non se van executar”.
Por todo isto, asegurou que desde o PPdeG, a través dos seus 13 senadores e 10 deputados nacionais, “imos seguir loitando porque a nosa Comunidade teña voz e deixe de estar marxinada por Sánchez”, algo que avanzou que tamén farán os populares desde a Xunta e desde o Parlamento. “Afortunadamente son os últimos Orzamentos de Sánchez antes da chegada de Alberto Núñez Feijóo á Moncloa”, subliñou.
SER A VOZ DA GALICIA EXTERIOR
Nunha rolda de prensa na que estivo acompañada polo secretario executivo do PP no Exterior, Antonio Rodríguez Miranda, Paula Prado referiuse á reunión que onte á tarde mantivo a Comisión de Acción Exterior do PPdeG: “Comprométome a que a Galicia exterior siga tendo voz e siga sentindo o Partido Popular como seu”.
Con esta fin, apuntou que que o presidente Alfonso Rueda viaxará á Arxentina e a Uruguay a vindeira semana, “un xeito de deixar claro que, tamén nesta nova etapa do PPdeG, imos ter presentes os galegos e galegas do exterior”. “Non somos un partido que viaxa a Colombia, Chile ou Brasil unicamente para sacar fotos e non falar de Galicia, como fai o BNG; somos un partido que viaxa a países como Arxentina ou Uruguay para escoitar as inquedanzas dos nosos irmáns e irmás. O PP seguirá sendo o que máis se parece á Galicia do exterior”, manifestou.
Pola súa parte, Rodríguez Miranda fixo referencia á derrogación do voto rogado poñendo en valor o “consenso parlamentario” á hora de conseguilo. Así mesmo, confirmou que o PP fará unha “vixilancia proactiva” para que realmente se cumpra o espírito da lei no desenvolvemento do regulamento e para axudar a que se leve a cabo da forma “máis eficaz posible” o que as Cortes Xerais indicaron: “Que os residentes no exterior teñan efectividade plena dun dereito fundamental como o de sufraxio, que ata o de agora non se mantiña”.
