A secretaria xeral do Partido Popular de Galicia, Paula Prado, criticou hoxe a “nova traizón a Galicia” do BNG, despois de que non apoiasen esta semana en Europa as medidas que melloraban o acordo de Mercosur para protexer o agro galego, como é o caso das cláusulas de salvagarda que os populares si defenderon no Parlamento Europeo. Neste sentido, puxo en valor as “políticas xustas que defende o PPdeG para que a xente viva do rural e no rural”.

Así o manifestou nunha visita a unha explotación gandeira en Lalín, acompañada polo dono da mesma e  coordinador de Medio Rural do PPdeG, Avelino Souto, e o portavoz de Medio Rural do PPdeG no Parlamento de Galicia, Miguel Ángel Viso, onde puxo en valor o citado concello, cun goberno popular á fronte, como “exemplo” de boa política no rural.

“O PPdeG demostrou esta semana unha vez máis ser o partido do rural, o que máis defende e mira polas necesidades dos nosos gandeiros e agricultores”, sinalou, lembrando a “presión” exercida polos populares en Europa, que conseguiron o aval do Parlamento europeo ás citadas salvagardas, que permitirán unha protección real e efectiva para os agricultores ante unha posible aplicación provisional do acordo comercial UE-Mercosur.

Por outra banda, lamentou a posición do BNG “en contra dos gandeiros e dos agricultores galegos”, coa súa falta de apoio a estas medidas extraordinarias que os protexen integramente, como leva tempo esixindo o PPdeG. “O independentismo galego, agora ao non apoiar as cláusulas de salvagarda, amosou unha vez máis a súa hipocrisía, como fai igualmente avalando a excesiva protección do lobo ou impedindo a flexibilización da PAC”, subliñou.

Porén, o PPdeG “seguirá votando si ao campo, á continuidade dun sector punteiro e si a que todos os produtos cumpran coas mesmas garantías e esixencias que se lle impón na Unión Europea aos nosos gandeiros e agricultores”.

PODER VIVIR NO RURAL E DO RURAL

A número dous do PPdeG reafirmou o compromiso dos populares para “seguir pelexando para que o acordo comercial non prexudique ao campo nin se faga de costas dos nosos profesionais”, e aproveitou para reiterar tamén a necesidade dunha PAC “xusta”.

“Seguiremos presionando para que os acordos de Europa favorezan as políticas que implantamos en Galicia, para que se sigan implantando explotacións rendibles e produtivas e se poida vivir no rural e do rural”, manifestou durante a visita á Gandería Midón en Lalín.