A secretaria xeral do PPdeG, Paula Prado, defende o “elevado grado de cumprimento” do programa electoral do partido nas eleccións autonómicas de 2024 acadado polo Goberno de Alfonso Rueda, a través de “políticas útiles” despois de máis de dous anos de mandato, onde a confianza que os galegos e galegas depositaron nas urnas “se está devolvendo con feitos, estabilidade e xestión”.
Así o manifestou durante unha rolda de prensa na sede autonómica do PPdeG, onde anunciou o acto “Galicia Goberna”, que se celebrará este sábado día 16 en Vigo, coa presenza do presidente autonómico e líder dos populares galegos para poñer en valor as medidas executadas e postas en marcha nos eidos da vivenda, educación, sanidade, rural ou no social dende que o PPdeG gañou nas urnas en 2024.
Prado insistiu en que a cidadanía quere “gobernos estables, como o do PPdeG”, a única formación que traballa para os galegos e galegas con “seriedade, traballo, rigor, tranquilidade e boa política”.
Neste sentido, a gran xuntanza do sábado, servirá para amosar “que somos un partido que cumpre, con palabra e unido”. Ademais do presidente Rueda, asistirán os responsables das diferentes áreas do Goberno galego, que asumiron tamén o seu compromiso cun programa electoral de medidas “ambiciosas, realistas e co foco posto nas persoas”.
VIVENDA PARA A CLASE MEDIA
No marco deses compromisos, fixo fincapé no acceso á vivenda, lembrando que se trata dun dos principais problemas da cidadanía, que Alfonso Rueda abordou co compromiso de duplicar o parque público de vivenda, construíndo 4.000 novas vivendas públicas, e que dous anos despois xa están en marcha.
A número dous dos populares galegos salientou tamén que o Executivo autonómico aprobou a Estratexia do impulso da vivenda protexida, un conxunto de medidas para facilitar a construción de máis vivenda protexida e que máis persoas accedan a ela. “A pesar do que di a oposición, o Goberno galego está construíndo vivenda pública. Estanse iniciando proxectos e estase traballando con responsabilidade e con rigor”, subliñou.
Do mesmo xeito, puxo en valor o resultado do Debate do Estado da Autonomía, no que se situou no centro á clase media. “Hai un grupo de familias que nunca poden acceder a axudas públicas porque non teñen unha renda o suficientemente baixa para acceder, pero tampouco o suficientemente alta para comprar unha vivenda cos prezos actuais do mercado. Por iso, esa clase media que queda desamparada, o motor que sostén ao país, poderá acceder xa á vivenda pública”, puntualizou.
Lamentou que fronte ao compromiso do Executivo galego, o Goberno central “non asume a gravidade do problema e ao longo destes oito anos só conseguiu facer da vivenda un luxo”. Lembrou que bloquearon o Plan de Vivenda do PP no Congreso, facendo que os españois “paguen máis e vivan peor”. En contraste, a iniciativa popular está pensada para “familias, mozos que queren emanciparse e propietarios que necesitan seguridade e protección”.
Tamén criticou a postura do BNG, que é “cómplice” dos socialistas no Goberno de Pedro Sánchez, esixindo que lle expliquen á xente “por que non queren unha lei de vivenda que facilite que haxa máis vivenda no mercado”.
