16 de xaneiro de 2023. O portavoz do Grupo Popular, Pedro Puy, criticou hoxe o “comportamento extremadamente centralizado que está a adoptar o Goberno de Pedro Sánchez en relación con cuestións fundamentais para Galicia, moi belixerante coas competencias autonómicas e que está a facer cuestións que son contraproducentes para acadar os resultados que pretenden as políticas impulsadas polo Goberno central”.
En primeiro lugar, Pedro Puy referiuse ás declaracións realizadas onte polo secretario de Estado de Medio Ambiente, nas que “deduciu que coa presentación do proxecto de Lei de ordenación do litoral por parte do Goberno galego estase facendo unha declaración de independencia”. Neste sentido, lembrou que esta iniciativa lexislativa baséase nas competencias recollidas no Estatuto de Galicia, que no seu artigo 27.3 recolle que a Comunidade galega ten competencia exclusiva en ordenación do territorio e do litoral, urbanismo e vivenda.
REACCIÓN SORPRENDENTE AO PROXECTO DE LEI DO LITORAL
Ademais, o portavoz popular destacou que tanto un ditame do Consello Consultivo, como o Observatorio do Litoral e os expertos consultados con carácter previo “non atoparon trazo algún de inconstitucionalidade” neste texto lexislativo, polo que “sorprende esta reacción do representante do Goberno central fronte a unha lei que o único que quere é defender os intereses de Galicia, as empresas asentadas no litoral galego e as peculiaridades do uso do litoral que fan que esta Comunidade autónoma sexa distinta a outros lugares costeiros de España”. “Combinando a imprescindible protección medioambiental é posible manter eses usos tradicionais que permiten o desenvolvemento económico e a creación de riqueza en Galicia”, engadiu.
Pedro Puy tamén incidiu na “discrecionalidade” coa que o Goberno de Pedro Sánchez está a usar os fondos europeos. Neste sentido, lamentou que as axudas directas “non están a beneficiar aos proxectos galegos”, polo que pediu, “ademais de cogobernanza e de que se teñan en conta as opinións de Galicia, que os proxectos galegos teñan igualdade de oportunidades” que os presentados noutros puntos de España. Así, insistiu que proxectos como o de Stellantis, Altri, Showa Denko ou Sentury “sigan sen ter unha resposta en termos de fondos europeos”.
FALTA DE EXECUCIÓN
“Esta centralización tamén está a conducir a unha falta de execución” dos fondos europeos, xa que, segundo informacións publicadas hoxe, só un terzo destes fondos foron executados. Deste xeito, Puy lembrou que “a propia Comisión Europea está vendo que a chegada destes fondos ao tecido empresarial estase producindo con lentitude”, o que supón unha “perda de oportunidade para modernizar o tecido empresarial de Galicia”.
“É necesario que o Goberno de España rectifique” estas decisións, incluído o feito de deixar a conexión Guitiriz-Zamora fóra na rede de hidróxeno verde que unira España co resto de Europa. “Agardamos que haxa unha rectificación dun comportamento que se produce como consecuencia dun escaso espírito de colaboración coas comunidades autónomas, nomeadamente con Galicia, e unha visión extremadamente centralista do Goberno de España”, insistiu.
