Santiago, 24 de febreiro de 2021- O portavoz do Grupo Popular avogou hoxe no Pleno do Parlamento por achegar posturas para que Galicia poida defender “o que lle corresponde en diálogo co Goberno de España e as demais comunidades autónomas, que nos permita a todos aproveitar a solidariedade europea dos Fondos COVID para impulsar os cambios que a economía galega e española terán que realizar no futuro se queren garantir o benestar”.
Pedro Puy indicou que “non cremos na bilateralidade nin na centralización, nós estamos pola cobernanza” e nese sentido resaltou que se debe aplicar un criterio nacional en combinación coas comunidades autónomas, polo que a Xunta votou en contra de que a Comisión sectorial dos Fondos só se reúna unha vez ao ano, “ así entende a cogobernanza o Goberno socialista”.
FONDOS COVID PARA GALICIA
O voceiro popular, que participou no debate dunha iniciativa do BNG, sinalou que hai unha incongruencia en demandar unha cifra para Galicia dos Fondos Europeos “ e fixar uns criterios que non darían esa cifra nin de broma”, en referencia á petición de fondos por parte dos nacionalistas, “que cambian de cifras falando primeiro dunha demanda dun 9% a falar dun 10,2% despois”.
“Resulta que non recoñecen que Galicia mellorou a produtividade, o emprego e o PIB per capita e entón poñen uns criterios baseados nun suposto atraso de Galicia que nos levaría a conquerir unha porcentaxe mesmo por debaixo do que nos correspondería no financiamento autonómico”. Así, indicou que para acadar o 9 ou o 10,2%, como demandaron en varias ocasións os nacionalistas, empregan varios criterios que, agás dous, darían un resultado moi lonxe desa demanda tales como a inversa do PIB per cápita, a taxa de desemprego, ou a inversa da produtividade.
Ademais, indicou, falan de criterios como a baixa taxa de reposición no persoal sanitario “cando Galicia leva anos repoñendo o 100% e por ese criterio non nos correspondería nada” ou falan de dispersión ou avellentamento sen especificar e con estes criterios “obteríamos cifras moi lonxes do 9% e menos do que nos correspondería polo sistema de financiamento autonómico actual”
Pedro Puy indicou que “compartimos os temores do BNG sobre un posible reparto de fondos perxudicial para Galicia, os antecedentes do ano 2020 non son bos, que nos deron o 4,8% que está por debaixo da poboación axustada que se ten en conta para financiar os servizos públicos , e tamén estamos a asistir ao mesmo reparto dos fondos 20-21, co 4,4% do total repartido, moi por debaixo do que lle correspondería en función do sistema de financiamento autonómico, o 6,6% “
“A responsabilidade de defender o que lle interesa a Galicia pasa por demandar uns criterios claros e xustificados” indicou Pedro Puy que defendeu que a Xunta leva traballando en tres tipos de proxectos: os elaborados pola Administración para mellorar os servizos públicos, e os proxectos público-privados e privados que encaixan no Plan estratéxico de Galicia elaborado pola Xunta.
Así mesmo recordou que o procedemento de xestión centralista provoca que non se coñezan os criterios de selección dos proxectos, demanda que o presidente da Xunta fixo nas reunións mantidas con membros do Goberno recentemente.
“Hai que estar preocupados polo reparto centralizado a través dos ministerios e pola inconcreción de criterios que está aplicando o Goberno de Madrid. Onde podemos intentar chegar a acordos é no marco pactado para negociar é a Comisión de reactivación que mañá nomea ponencia.Intentaremos achegar posturas para que Galicia poida defender o que lle corresponde” finalizou dicindo o voceiro popular.
