Santiago, 13 de marzo de 2017.- O portavoz do Grupo Popular, Pedro Puy, asegurou hoxe que, coa documentación existente na Comisión de Investigación sobre as caixas galegas, á que se sumarán novas sentenzas e os informes publicados nos últimos tempos, ademais de todas as comparecencias que tiveron lugar, “hai capacidade para facer un ditame cunha visión plausible e realista do que aconteceu” con estas entidades financeiras galegas desde antes da crise económica ata a súa venda.
Pedro Puy lembrou que esta semana remata o prazo para a presentación de propostas de plan de traballo da Comisión de Investigación sobre as antigas caixas de aforro galegas e avanzou que desde o Grupo Popular proporase “incorporar todo o traballo feito” na anterior lexislatura e que se estendeu non só á situación económica das caixas, senón tamén ás participacións preferentes, á obra social ou ao funcionamento das comisións de control de ambas entidades..
NOVA DOCUMENTACIÓN
A esta documentación, “engadiremos documentos novos relacionados co obxecto desta comisión de investigación, como as sentenzas da Audiencia Nacional e o Tribunal Supremo sobre as indemnizacións dos seus ex directivos ou o informe do Tribunal de Cuentas sobre a venda das entidades nacionalizadas, que inclúe unha análise de Novagalicia Banco”, avanzou.
“Con todo este material será posible facer unha explicación plausible da evolución das caixas galegas desde antes da crise económica ata cando se producen os cambios normativos, co impulso das fusións por parte do Banco de España e a súa posterior nacionalización e venta”, sinalou o portavoz popular.
Respecto das incorporación de comparecencias, Puy sinalou que “imos ver cales son as propostas que fan os demais grupos da oposición”, pero subliñou que os comparecentes na anterior lexislatura “foron todos aqueles que tiveron algunha responsabilidade nas antigas caixas e será difícil que volvan comparecer persoas que desenvolveron funcións naqueles momentos”.
