O presidente do PPdeG subliña que un candidato «non é nada sen un magnífico equipo”, pois “de nada vale, por moi potente que sexa, se o resto dos que o teñen que axudar, non o fan”
O presidente do PPdeG, Alfonso Rueda, fixo fincapé hoxe en que os populares galegos empezarán “xa” a “pisar o acelerador” para estar preparados para as municipais, e non depender así “do que fagan os demais”.
“Non temos outros aliados que a xente que nos vota, non temos outra esperanza que a maioría suficiente”, sinalou.
Así se pronunciou no Congreso Local do PP da Coruña, no que Miguel Lorenzo foi elixido novo presidente da formación na cidade. “Estamos dando un bo exemplo das cousas que hai que facer para gañar”, subliñou Rueda.
En clave municipal, dirixiuse aos seus afirmando que “un magnífico candidato non será nada sen un magnífico equipo”, posto que “de nada vale, por moi potente que sexa, se o resto dos que os teñen que axudar, non o fan”.
Así mesmo, pediulles “esixir, dicilo todos os días e non esquecerse”, poñendo como exemplos os “incumprimentos” do Goberno central, que tamén afectan á cidade da Coruña, onde a alta velocidade ferroviaria segue sen chegar, así como os fondos Next Generation, dos que “a día de hoxe non se sabe absolutamente nada”.
Rueda apuntou que “todos eses esforzos que están a facer os cidadáns” teñen que “reverter neste momento, cando máis se precisa”. Neste sentido, lembrou que o Goberno central anunciou esta semana “unha nova subida fiscal, e xa van 25, pero ningunha baixada”, preguntándose onde están os 15.000 millóns de euros que recadou este ano de máis coas subas de impostos. “Que os reparta á xente máis desfavorecida e ás empresas que máis o precisan”, dixo.
“MERECE TODO O APOIO DO MUNDO”
No marco do Congreso Local, Rueda dixo que Miguel Lorenzo ten por diante “un reto difícil, pero bonito” e sabe que “só lle vale gañar”, polo que ten “as cousas claras desde o principio”. “Merece o apoio de todo o mundo”, engadiu.
Miguel Lorenzo recibiu o 92 % de apoio e estivo acompañado polo partido local e provincial, representantes autonómicos e un bo número de senadores, entre outros moitos asistentes.
“Se alguén que se entrega tanto en todo e lle bota corazón decide dar este paso, e presentarse como candidato para ser alcalde da Coruña, vaino conseguir, sen ningunha dúbida”, asentiu o número un dos populares galegos, seguro que de que o 28 de maio de 2023 Lorenzo vaise levar a “enorme recompensa” de ser rexedor.
