18, xuño, 2020. O secretario xeral do PPdeG, Miguel Tellado, asegurou que Galicia non pode ser penalizada por ser unha das Comunidades con mellor xestión da pandemia, por ter un bo sistema de atención a domicilio e por ter actuado con axilidade e anticipación coas residencias integradas. Así se refería ao inxusto reparto dos fondos que prepara o Goberno central para compensar ás Autonomías polos gastos que trouxo consigo a pandemia.
Segundo aseverou, Galicia oponse aos criterios de reparto do fondo Covid anunciados no Consello de Ministros, xa que se cambian os utilizados ata agora tanto no reparto do fondo aprobado en marzo como no vixente sistema de financiamento autonómico.
De feito, en marzo, a poboación protexida tiña un peso do 80% mentres que agora redúcese a menos do 40%, menos da metade. “Isto prexudica a Galicia porque reduce o peso do avellentamento, que é precisamente a poboación que maior investimento sanitario precisa”, explicou o secretario xeral engadindo que a proposta é totalmente insuficiente para a Comunidade, igual que o teñen expresado outras Autonomías de distinto signo político.
Ademais, no reparto do gasto sanitario o Goberno só ten en conta o hospitalario sen ter en conta o gasto por atender a persoas nos seus fogares, nas residencias integradas ou polo gasto que afrontou Galicia en atención primaria. “Unha vez máis, non pedimos máis fondos que ninguén, pero si que non se nos discrimine por ter xestionado esta crise con rigor”, insistiu Tellado.
De igual xeito, pediu ao Goberno central un pouco máis de sensibilidade cos problemas de Galicia: “Que se busquen solucións para Alcoa e as demais electrointensivas, que non se ataque ás nosas empresas situadas no dominio público marítimo-terrestre coa reforma do Regulamento da Lei de Costas e que non se poñan trabas á recuperación económica nin ás axudas as empresas e traballadores”.
Así mesmo, falou do episodio absolutamente incomprensible vivido estas semanas na Deputación de Ourense, no que semella que o PSOE provincial aposta por frear as axudas directas aos autónomos da provincia. “Se os socialistas galegos non queren ser parte da solución aos problemas dos seus veciños, alomenos agradeceriámoslles que non puxesen máis trabas a aqueles que si queremos axudar a saír desta crise”, salientou.
PRESENTACIÓN DAS CANDIDATURAS
Por outra banda, o número dous do PPdeG anunciou que o partido celebrará a presentación de candidaturas este domingo nun acto innovador, que reflectirá a filosofía da que será unha campaña diferente “na que primará a precaución e a seguridade, será máis dixital e audiovisual e na que seguiremos igual de pegados ao territorio ca sempre”.
Como indicou, será un evento con cinco sedes distintas pero conectadas: os presidentes Feijóo e Casado intervirán desde Santiago de Compostela e as cabezas de lista das catro candidaturas farán o propio desde a súa capital de provincia, arroupadas polos compañeiros de cada unha delas.
“Galicia é unha cidade única, con 2.700.000 habitantes, e este partido é moi grande e está en cada recuncho dela” dixo recoñecendo que os populares utilizarán a tecnoloxía para ser prudentes pero facer o que sempre fai o PPdeG: “Chegar a cada punto da Comunidade e levar a nosa mensaxe a cada galego”.
Cómpre lembrar que o presidente Feijóo tomou a decisión de renunciar a máis de 30 días de precampaña electoral para centrarse na xestión da pandemia e na desescalada. Desde hai un mes que se convocaran as eleccións o PPdeG non celebrou nin un só acto público de carácter preelectoral.
Nese senso, Tellado recordou que os populares expresaron a súa vontade de reducir a campaña, unha proposta á que se lles contestou mesmo con insultos desde os partidos da oposición, que non interromperon nin un día a súa precampaña, presentaron candidaturas e programas electorais e mantiveron encontros sectoriais e territoriais cos seus alcaldes e cargos institucionais. “Desde o PPdeG respectamos a súa estratexia en todo momento, aínda que non a compartísemos”, aclarou sinalando que a súa formación retomará a actividade electoral no mesmo punto que a deixou en marzo, cando quedaba unha semana para comezar a campaña.
