O secretario xeral do PPdeG, Miguel Tellado, asegurou esta mañá que, no seu afán por facer que a maioría dos galegos note a recuperación, no primeiro ano desta Lexislatura a Xunta «quixo traducir o crecemento económico en benestar para os cidadáns».
Tras lembrar que esta fin de semana se cumpre o primeiro aniversario da toma de posesión de Alberto Núñez Feijóo para comezar o seu terceiro mandato como presidente da Xunta, logo de acadar a súa terceira maioría absoluta; Tellado puxo en valor que hoxe a nosa Comunidade está mellor ca hai un ano. “E cremos, se tiveramos que resumilos, que estes doce meses estiveron marcados pola consolidación do crecemento económico, pola mellora dos servizos sociais e pola estabilidade institucional”, subliñou.
Nese senso, salientou que nos últimos doce meses, a economía galega tivo un comportamento extraordinario, crecemos no entorno do 3%, máis cá media española; temos máis de 18.000 afiliados máis á Seguridade Social, o INE reflicte que os salarios creceron, batemos un novo récord de exportacións e en turismo, volvéronse baixar os impostos autonómicos e mantivéronse as rebaixas de anos anteriores, e aprobouse unha Lei que pretende darlle un impulso á implantación de empresas e a creación de postos de traballo.
Así mesmo, Tellado tamén apuntou que no último ano asistimos á mellora dos servizos públicos e a un novo esforzo por parte do Goberno autonómico en materia de Política Social. Deste xeito, entre outros logros destacou o recente anuncio da ampliación do Bono Coidado ata os 12 anos así como a da Tarxeta Benvida ata os tres anos, a apertura dos dous primeiros quirófanos híbridos de España nos Hospitais de Vigo e A Coruña, a aprobación aínda onte dun Plan de Excelencia do Sistema Universitario, ou a continuación da ampliación do número de prazas en escolas de infantil, centros de día, de atención á discapacidade e residencias de maiores.
O número dous do PPdeG considerou que nada disto se podería ter conseguido sen a estabilidade institucional que os populares galegos levan reivindicando durante estes anos como un dos grandes valores da nosa Comunidade. “E seguirémolo facendo, porque nos últimos tempos demostrouse que é máis importante ca nunca”, recoñeceu.
Do mesmo xeito, aseverou que nestes últimos meses, e malia a estarmos sufrindo en España a maior das ameazas ao Estado de Dereito en décadas, Galicia conseguiu presentar dous orzamentos en tempo e forma, grazas a non ter un gobernado secuestrado por unha minoría e amosarse como un territorio con seguridade xurídica e fiable para investir.
“En definitiva, cremos que o Goberno que lidera Alberto Núñez Feijóo ten demostrado que ten unha folla de ruta moi clara, ten a receita para aplicala con éxito e ten a ambición para seguilo facendo e mellorando nos tres anos que aínda quedan por diante. E desde o Partido Popular de Galicia consideramos, con toda humildade, que iso son moi boas novas para o conxunto dos galegos”, remarcou.
Tellado concluíu afirmando que no PPdeG están convencidos de que a recuperación económica, a creación de emprego, e as baixadas selectivas de impostos seguirán sendo a súa principal prioridade; que Galicia seguirá apostando pola política social, pola sanidade pública, pola educación, pola conciliación familiar e pola atención á dependencia; e que a estabilidade institucional seguirá a ser unha das súas grandes fortalezas e un dos grandes activos desta Comunidade.
