Santiago, 22 de marzo de 2017.- O Grupo Popular apoiou hoxe no Parlamento a aprobación dunha proposición non de lei a través da que se demanda ao Goberno central que elimine as restricións impostas ás comunidades autónomas mediante as limitacións ás taxas de reposición de prazas no Sistema Nacional de Saúde. Ademais, solicítase que, unha vez eliminada esta taxa de reposición, a Xunta convoque unha OPE no ano 2017 que chegue a 1.600 prazas.

O portavoz de Sanidade, Aurelio Núñez Centeno, lembrou que “tanto o Presidente da Xunta como o conselleiro de Sanidade teñen reivindicado publicamente a eliminación da taxa de reposición e teñen anunciando unha OPE para 2017 que contempla a totalidade das prazas que quedaron vacantes o pasado ano”. “En concreto, serán 820 prazas para as distintas categorías, que se poderían duplicar ata as 1.600 no caso de que desaparecera a taxa de reposición”, apuntou.

Porén, Aurelio Núñez reiterou que “se non hai orzamentos a nivel estatal hai que prorrogar os actuais, e parece difícil aboar as cantidades económicas correspondentes a esas novas prazas sen asignación orzamentaria”.

INCREMENTO DO PERSOAL FIXO

Por outra banda, Núñez Centeno salientou “o compromiso firme da Consellería de Sanidade de ofertar 438 prazas para interinidades de xeito inmediato: a principios do mes de abril”. “Estas medidas xa foron anunciadas pola Consellería nunha reunión mantida cos sindicatos, así como o establecemento dun calendario de negociacións doutros asuntos de especial interese”, engadiu.

“Todas estas medidas conducirán a un incremento do persoal fixo, ao tempo que reducirá en tres puntos a porcentaxe de eventualidade, pasando do 8 ao 5 por cento”, explicou o portavoz popular, quen tamén subliñou que o SERGAS “é un dos servizos de saúde cunha cifra máis elevada de vínculos estables: arredor do 80 por cento”.