Santiago, 16 de xaneiro de 2018.- O Grupo Popular defenderá no Pleno da vindeira semana que a dotación dun novo centro de saúde para o barrio da Falperra en A Coruña, nun espazo adecuado cedido polo Concello no actual edificio do Mercado de Santa Lucía. Así mesmo, demandará que a Xunta siga desenvolvendo accións para por en común con outras rexións e flotas pesqueiras as experiencias e coñecementos obtidos en torno á problemática dos descartes da pesca.

Ao remate da Xunta de Portavoces celebrada esta mañá, o portavoz popular, Pedro Puy, informou que a sesión plenaria da vindeira semana incorpora a comparecencia da conselleira do Medio Ambiente e Ordenación do Territorio, para falar da política en materia da paisaxe; e do conselleiro de Facenda, que informará do peche do exercicio económico de 2017 e as liñas de actuación previstas para 2018.

No apartado de proposicións non de lei, Puy explicou que o Grupo Popular, recollendo a solicitude rexistrada no Parlamento galego por parte da Asociación de Veciños e Comerciantes da Falperra en A Coruña, respaldada por máis de 3.200 sinaturas, defenderá que a Xunta siga traballando para a construción dun novo centro de saúde nun espazo adecuado cedido polo Concello no actual edificio do Mercado de Santa Lucía.

O escrito rexistrado pola Asociación de Veciños insta ao Concello de A Coruña “a deixar de bloquear” a construción do centro de saúde no edificio do Mercado de Santa Lucía, polo que “esiximos un cambio da actitude do alcalde de A Coruña, aberta ás propostas veciñais e, por suposto, a colaborar con  lealdade coa Xunta de Galicia, que pretende realizar un  investimento importante” neste barrio coruñés.

SOLUCIÓNS PARA OS DESCARTES

A segunda das proposicións non de lei do Grupo Popular ten como obxectivo que a Xunta siga desenvolvendo accións para por en común con outras rexións e flotas pesqueiras europeas as experiencias que se van coñecendo en materia de descartes.

A iniciativa recoñece que a incorporación da variable do descarte “supón un elemento moi prexudicial para a nosa flota, e necesitamos solucións progresivas pero tamén rápidas, nas que a posta en común de accións de adaptación e mellora neste eido con outras flotas afectadas será un punto importante de traballo a prol de conseguir avanzar nesta cuestión”.

Polo que respecta ás preguntas, o Grupo Popular cuestionará ao Goberno galego sobre a epidemia de gripe sufrida en Galicia nas últimas semanas e as medidas que se teñen tomado para facer fronte á situación de incremento asistencial nos hospitais galegos; pedirase unha valoración sobre a situación actual do Centro Galego de Bos Aires e a posible venda deste inmoble; e, por último, sobre as datas previstas para a construción das estacións intermodais nos concellos galegos.