Santiago, 14 de febreiro de 2017.- O Grupo Popular defenderá no Pleno da vindeira semana que a Xunta elabore, coa participación do Consello de Acción Exterior, un informe sobre os posibles impactos do Brexit na economía galega e nos seus sectores produtivos. Así mesmo, demandarase ao Goberno galego a consolidación das casas-niño para que todos os concellos de Galicia teñan recursos de conciliación no ano 2020.

Ao remate da Xunta de Portavoces, o viceportavoz do Grupo Popular, Miguel Tellado, fixo un balance da orde do día da sesión plenaria que se celebrará a vindeira semana, na que 25 dos 31 puntos que incorpora son a iniciativa da oposición.

CUARTO DEBATE SOBRE ANGROIS

Tellado explicou que o Grupo Popular aceptou que “por cuarta vez se debata sobre a constitución dunha comisión de investigación sobre o accidente de Angrois. “Aceptamos todos os debates pero reiteramos os argumentos que xa temos defendido nesta Cámara sobre por que entendemos que este non é o foro adecuado”, indicou.

Ademais, lembrou que o Regulamento do Parlamento recolle a posibilidade de que un terzo dos deputados pidan e aproben a apertura dunha Comisión de Investigación, polo que “se os grupos da oposición queren abrir esta comisión de investigación non precisan do apoio do Grupo Popular e poderían facelo cos seus propios votos”.

O Pleno do Parlamento incorpora tamén a comparecencia de dous conselleiros para continuar co paso polo Parlamento de responsables do Goberno galego para dar conta dos obxectivos dos seus departamentos. En concreto, nesta sesión comparecerán o conselleiro de  Economía, Emprego e Industria, e o de Sanidade, á que se acumula unha solicitude da oposición para que informe dos feitos que se produciron recentemente na Unidade Psiquiátrica do Hospital de Conxo.

BREXIT E CASAS-NIÑO

O Grupo Popular defenderá nesta sesión plenaria dúas proposicións non de lei. A primeira, insta á Xunta a elaborar, coa participación do Consello de Acción Exterior de Galicia, un informe sobre os posibles impactos do Brexit na economía galega e nos seus sectores produtivos. O obxectivo é que este documento faga un diagnóstico das oportunidades e ameazas derivadas da saída do Reino Unido da Unión Europea, contemplando ademais os distintos escenarios temporais e ritmos de aplicación da normativa da Unión Europea.

A segunda proposición non de lei ten como obxectivo que a Xunta consolide as casas-niño nos concellos rurais galegos, de xeito que no ano 2020 todos os municipios galegos dispoñan de recursos de conciliación que faciliten a fixación de poboación no rural e permita a todas as familias galegas compatibilizar a súa vida familiar e laboral.

No apartado de preguntas, o Grupo Popular cuestionará ao Goberno galego sobre as actuacións realizadas e as previsións de futuro respecto da praga da pataca e respecto da situación na que se atopa a execución da nova estación intermodal no concello de Vigo.

CONCIENCIA TRANQUILA COS PREFERENTISTAS

Cuestionado sobre a situación dos afectados polas preferentes, Miguel Tellado lembrou que o Goberno galego foi pioneiro na implantación da arbitraxe para a resolución deste conflito e que na actualidade máis do 80 por cento dos afectados xa recibiron a totalidade dos seus aforros. “Os que aínda non recuperaron o seu diñeiro foron os que acudiron á vía xudicial e están pendentes da resolución das súas demandas”, apuntou.

Tellado afirmou que, tanto o Goberno galego como o Grupo Popular, “temos a conciencia moi tranquila porque ante un problema que non xeramos nós, como foi a estafa dos preferentistas, actuamos con determinación, mentres outros buscaron a calada política para ver como se xeraba un conflito contra o Goberno e incluso animábanos para que non acudiran á vía da arbitraxe”.