Santiago, 16 de marzo de 2021.- A portavoz de Enerxía do Grupo Popular, Marta Nóvoa, criticou hoxe no Parlamento que o BNG “insista en que a Xunta incumpra a súa obriga de tramitar os proxectos de parques eólicos no oriente ourensán e no sur de Lugo cumprindo sempre a normativa ambiental e sectorial vixente”.

“Neste momento os proxectos están e fase de consultas previas e aínda non se ten presentado o estudo de impacto ambiental, e será aí onde se avalíen o grao de afectacións destes proxectos eólicos”, concretou.

No debate dunha iniciativa do BNG sobre os proxectos eólicos de Neboada,Treboada, Xeada, Orballeira e Ventumelo, Marta Nóvoa dixo que “a situación actual destas iniciativas é que ningunha iniciou a tramitación sectorial, senón unicamente a solicitude de determinación do documento de alcance do estudo de impacto ambiental, que tamén leva consulta pública”.

“Diante desta situación, o BNG presenta unha iniciativa cargada de ideoloxía extremista e sectaria, en contra do sector eólico, cargada de falsidades e co único obxectivo de fomentar o medo entre os cidadáns”, sinalou a portavoz popular, quen engadiu que “como ven que a Galicia lle pode ir ben no sector da enerxía renovable, deciden comezar a facer unha campaña negativa sobre o sector e, o que é máis grave, incitando ao Goberno galego a cometer ilegalidades”.

GARANTÍA MEDIOAMBIENTAL

Marta Nóvoa apuntou, ademais, que o BNG “considere na súa iniciativa que os macroparques de máis de 50 MW que tramita o Goberno central teñen máis garantías, cando a tramitación ambiental é a mesma para o Estado que para as comunidades autónomas porque se rexen polas mesmas normas e os funcionarios que as tramitan son igual de rigorosos”.

Así mesmo, Nóvoa negou que estes cinco parques eólicos sexan do mesmo promotor, ao tempo que salientou que están separados polo río Sil, a N-120, a liña de ferrocarril e a futura autovía A-76. “É evidente que todos utilicen de forma común a mesma liña de evacuación ou o lugar dos transformadores, para minorar o impacto ambiental que suporía a creación de subestacións e liñas repartidas para cada proxecto”, indicou.

Para rematar, a portavoz popular insistiu que “non se poden instalar parques en Rede Natura desde 2014 e tamén está moi restrinxida a súa repotenciación”, ao tempo que lembrou que “se está a traballar nunha nova proposta de delimitación de espazos de turbeiras para incluír na Rede Natura, o que significaría o peche da rede galega de zonas especiais de conservación”.