Santiago, 30 de setembro de 2020.- O deputado do Grupo Popular Martín Fernández Prado criticou hoxe que o BNG queira interferir desde o Parlamento na tramitación ordinaria dos expedientes administrativos e de querer anular por decreto-lei as cousas que ideoloxicamente non lles gusta. Neste sentido, asegurou que “todos os proxectos que se desenvolven en Galicia compren con todas as garantías urbanísticas, ambientais e técnicas que establece a legalidade vixente” e, a modo de exemplo, sinalou que o proxecto mineiro Alberta I nas provincias de Ourense e Pontevedra “non se aprobará se existen elementos que o fagan incompatible”.
Martín Fernández criticou aos nacionalistas galegos a súa “obsesión por interferir nos expedientes administrativos, sen seguir os trámites que establece a lexislación, porque non lle gustan os proxectos, poñendo en dúbida o traballo dos funcionarios da Xunta de Galicia e chegando a inventar unhas tramas que ninguén cree nin se demostran, porque o importante é difamar”.
“A situación que estamos a vivir co proxecto mineiro Alberta I non é novo e xa o vivimos outras veces neste Parlamento”, lembrou o deputado popular, que citou antecedentes como os proxectos para a mina de Touro ou de Corcoesto. Así, subliñou que “a Xunta tramita todos os expedientes dun xeito legal, en base a criterios técnicos e seguindo os informes de funcionarios que coñecen a materia”.
MÁXIMO RIGOR E TRANSPARENCIA
O deputado popular incidiu que “a Xunta actuará co proxecto Alberta I co máximo rigor e transparencia na súa tramitación e se pronunciará ao remate da súa tramitación de forma motivada en base a avaliacións profesionais e técnicas, seguindo os pasos que marca a Lei da minería, tendo en conta a protección do interese público e respectando todas as sensibilidades”. “Unha lei de minería aprobada polo bipartito, e que sumada á lei de avaliación ambiental de 2013 veñen demostrando que se tramitan os proxectos mineiros en Galicia con rigor e a máxima garantía e esixencia ambiental”, apuntou.
No caso da explotación da concesión derivada Alberta I, foi avaliado polos técnicos, que determinaron que o proxecto en cuestión non entra no ámbito de aplicación definido polo artigo 7 da Lei 21/2013, do 9 de decembro, de avaliación ambiental, por non revestir as características definidas pola letra b) do grupo 2 do anexo I de dita norma, no que se delimitan os proxectos de minaría subterránea susceptibles de ser avaliados ambientalmente.
Por último, Martín Fernández reiterou que “a Xunta e o Grupo Popular defenden que o aproveitamento racional e eficiente dos recursos naturais é compatible coa protección do medio ambiente e co desenvolvemento do medio rural, traballando e consolidando un modelo de minería sostible e respectuoso”.
“Trátase dun sector estratéxico para a economía galega e a creación de emprego, polo que a nosa prioridade é que a minería se desenvolva cumprindo coa necesidade de coidar o medio ambiente e promover unha actividade económica responsable, a diferenza da postura do BNG de opoñerse a calquera proxecto de xeito ideolóxico sen ter en conta a tramitación administrativa e o cumprimento da legalidade”, manifestou.
