Santiago, 17 de novembro de 2021.- A viceportavoz do Grupo Popular, Paula Prado, considerou “unha prioridade que o Goberno de España poña na axenda lexislativa as reformas penais urxentes que os datos de criminalidade están a demandar”.
En concreto, manifestou que “ten que abordar canto antes a reforma do Código Penal, porque a delincuencia, nestes momentos, vai por diante da normativa, o que xera en moitos casos dificultades para perseguir o delito e, o que é peor, situacións de impunidade indesexables”.
Na réplica á comparecencia do fiscal superior de Galicia no Parlamento galego para presentar a Memoria da Fiscalía de 2020, Paula Prado concretou que “non podemos estar máis de acordo co fiscal na urxencia dunha reforma da lexislación para garantir a propiedade e para devolvela ao seu lexítimo dono no menor tempo posible”. Neste sentido, lamentou que “en España, neste momento, a lexislación protexe máis ao delincuente que ao lexítimo propietario, e iso non é nin xusto nin propio dun país democrático que ten a obriga de defender os dereitos da cidadanía”.
MEDIDAS CONTRA A OKUPACIÓN
A Fiscalía propón sobre os delitos de usurpacións de bens inmobles ou okupacións un incremento da pena; o establecemento atenuado ou traballos en beneficio da comunidade cando a persoa restitúa o inmoble en 48 horas; a previsión dun tipo agravado cando a okupación se prolongue máis aló de 15 días, cando se desenvolva no inmoble okupado unha actividade delituosa e cando o autor ou autores formen parte dun grupo ou organización criminal; e a tramitación destes delitos por xuízo rápido e a posible adopción de medidas cautelares na instrución sobre a base dunha pena privativa de liberdade.
Paula Prado tamén afirmou coincidir coa Fiscalía “na necesidade de impulsar unha modificación lexislativa en relación aos delitos de quebrantamento de condena continuados, coa gravidade de perigo que supón para as vítimas; así como reformar a tipificación dos delitos contra a liberdade sexual baixo os efectos das chamadas drogas de submisión química, co fin de que sexan considerados agresións sexuais e non meros abusos sexuais”.
TECNOLOXÍAS DA INFORMACIÓN
A viceportavoz popular fixo referencia “a un novo espazo para a actividade delitiva: as tecnoloxías da información”. Así, afirmou que as TIC “provocaron un dobre impacto no ámbito das tipoloxías delituosas: por unha banda, constitúen un medio para executar novas formas de delitos clásicos, como estafas, ameazas, inxurias ou calumnias; e, por outra banda, provocaron o xurdimento de novas figuras delituosas, como os ataques a sistemas informáticos, danos informáticos ou interceptación de transmisión de datos”.
Respecto do incremento de delitos contra a liberdade sexual cometidos a través de internet, Prado avogou por “abordar sen demora a gran reforma do proceso penal en España” e salientou que “en Galicia non temos competencia para modificar nin o Código Penal nin a Lei integral de violencia de xénero estatal, pero si imos introducir unha nova forma de violencia de xénero na nosa normativa autonómica: a violencia dixital”, que se aprobará no Pleno da vindeira semana.V
