Santiago, 2 de febreiro de 2021.- O Grupo Popular defenderá no Pleno da vindeira semana dúas proposicións non de lei a través das que se demanda a supresión do artigo do proxecto de Lei de cambio climático e transición enerxética que afecta ao prazo de duración das concesións de dominio público marítimo-terrestre recollido na Lei de costas; e se solicita á empresa Siemens-Gamesa que suspenda o ERE da planta de As Somozas e acepte a formación dunha mesa de traballo co obxectivo de atopar solucións que garantan a viabilidade e o futuro desta planta.
Ao remate da Xunta de Portavoces, o portavoz popular, Pedro Puy, informou que na sesión plenaria da vindeira semana debateranse para a súa aprobación dous proxectos de lei: o de residuos e solos contaminados de Galicia, e o de museos e outros centros museísticos.
O Pleno continuará coa comparecencia do vicepresidente segundo da Xunta e conselleiro de Economía, Empresa e Innovación, por petición propia, para informar das previsións e liñas xerais de actuación do seu departamento e as medidas fronte á Covid-19.
INDUSTRIA ESTRATÉXICA PARA GALICIA
Dentro do apartado de proposicións non de lei, o Grupo Popular demandará a supresión ou modificación substancial, previo diálogo co sector afectado, do artigo do proxecto de Lei de cambio climático e transición enerxética que xera inseguridade ao complexo mar-industria de Galicia ao afectar ao prazo de duración das concesións no dominio público-marítimo terrestre recollido na Lei de Costas.
Pedro Puy lembrou que “a industria relacionada coa transformación de produtos do mar é estratéxica para Galicia” e concretou que con esta modificación normativa se verían afectadas directamente arredor dun centenar de empresas, “que poderían ter problemas serios para a renovación da súa concesión e facer inviables os seus negocios”.
Deste xeito, o Grupo Popular solicita a supresión deste artigo do proxecto de Lei de cambio climático e transición enerxética, ao tempo que demanda acadar un consenso para que esta e calquera outra modificación da Lei de Costas se leve adiante logo dun estudo profundo e o diálogo co complexo mar-industria alimentario.
RETIRADA DO ERE EN SIEMENS-GAMESA
Unha segunda proposición non de lei do Grupo Popular ten como obxectivo que a empresa Siemens-Gamesa suspenda o ERE da planta de As Somozas e acepta a formación dunha mesa de traballo, con representación do Goberno central, a Xunta e os traballadores, co obxectivo de atopar solucións que garantan a viabilidade e o futuro da planta.
Así mesmo, solicítase que a Xunta, en colaboración co Goberno de España, utilice todos os mecanismos á súa disposición para lograr que Siemens-Gamesa manteña a planta de As Somozas, apostando pola súa modernización e pola implantación de novos proxectos industriais que garantan a carga de traballo para os traballadores da empresa.
Pedro Puy informou, ademais, que o Grupo Popular preguntará ao Goberno galego no Pleno sobre o plan de ensino virtual para blindar o estudo en caso de confinamento parcial ou total dunha aula ou un centro; e sobre as actuacións próximas previstas no Complexo Hospitalario de Santiago.
O Grupo Popular tamén se interesará no Pleno pola valoración do Goberno galego sobre o feito de que o 1 de xaneiro deste ano as peaxes da AP-9 volveran a subir e non se aplicaran as rebaixas das peaxes anunciadas polo Goberno central.
TRASPASO DEMANDADO DESDE HAI ANOS
O portavoz popular lembrou que esta tarde debátese no Congreso a toma en consideración da proposición de lei do Parlamento de Galicia sobre a transferencia da titularidade e competencias da autopista AP-9 á Comunidade galega. Puy lembrou que este traspaso vén sendo demandado desde hai varios anos e saudou a actitude favorable a esta transferencia, aínda que expresou “certa decepción porque esa actitude favorable non vaia acompañada doutras accións, como a supresión da peaxe en Redondela ou o enlace orbital de Santiago”.
Ademais, considerou “necesario abrir as negociacións na Comisión Mixta de Transferencias para avanzar noutras cuestións e fixar os termos do traspaso, o que contribuiría a que todos fósemos máis optimistas polo paso que se vai dar hoxe no Congreso”.
