Santiago, 3 de febreiro de 2021.- O viceportavoz do Grupo Popular, Miguel Tellado, incidiu hoxe no Parlamento galego na “preocupación pola situación dramática que vive o sector naval da ría de Ferrol”, polo que anunciou que “reiteraremos cada mes nesta Cámara a solicitude ao Goberno central para que realice o encargo dun barco nos estaleiros de Navantia”.
Así mesmo, o Grupo Popular apoiou a aprobación dunha proposición non de lei a través da que se demanda ao Goberno de España que dote á fábrica de turbinas de dirección e recursos propios suficientes para a definición de novos produtos destinados ao sector das enerxías renovables, en particular a eólica mariña.
Miguel Tellado lembrou que “a carga de traballo nos estaleiros da ría de Ferrol se esgota” e manifestou que “sobre a política industrial na comarca de Ferrolterra o PSOE debe estar calado”. En concreto, lamentou que “o Goberno socialista negou toda posibilidade de traballo para Ferrol: perderon os contratos das fragatas de EE.UU., retrasaron a construción das fragatas F-110 e nos negaron o BAM, que levaron aos estaleiros de Cádiz”.
MESA DE ÁMBITO GALEGO
Diante desta situación, o viceportavoz popular avanzou que “imos traer de forma reiterada cada mes, ben a comisión parlamentaria ou ao Pleno, a mesma iniciativa pedindo que o Goberno central encargue un barco de execución inmediata nos estaleiros da ría de Ferrol”. “Imos traela ata que aos socialistas se lles caia a cara de vergoña e a voten a favor neste Parlamento”, apuntou.
O Grupo Popular apoiou a aprobación dunha proposición non de lei do BNG a través da que se demanda ao Goberno de España a constitución dunha mesa de ámbito galego para a promoción da diversificación de actividades de Navantia en Ferrol, dotando á fábrica de turbinas de dirección e recursos propios suficientes para a definición de novos produtos destinados ao sector das enerxías renovables en xeral, fomentando a súa introdución e participación nos contratos da eólica mariña en particular. Así mesmo, demándase a introdución na fábrica de turbinas naqueles segmentos de actividade relacionados cos novos modelos sustentables de mobilidade marítima, procurándose as colaboracións con centros de investigación ou empresas que fosen precisas.
“Celebramos que o BNG crea na eólica mariña como un campo de diversificación de actividade industrial de Navantia, porque lembramos que cando desde o Grupo Popular o propuxemos entre 2014 e 2015 foi motivo de burla por parte dos nacionalistas e das Mareas de Podemos, en particular pola actual ministra de Traballo, Yolanda Díaz”, sinalou.
AVANCE NA EÓLICA MARIÑA
Miguel Tellado reiterou que “estamos a favor de que Navantia avance no mercado da eólica mariña, ben en solitario ou en UTE con outras empresas que aportan o coñecemento, a tecnoloxía ou a experiencia”. Neste sentido, agradeceu “a aposta que a empresa asturiana Windar fixo no seu momento pola comarca de Ferrolterra, poñendo en valor unhas instalacións achatarradas polos socialistas”.
Por último, na proposición non de lei tamén se inclúe a solicitude para que a Xunta entre no Consello de Administración de Navantia, “unha previsión legal que xa está prevista na Lei do sector naval de Galicia de 2010”. “Supoño que o BNG confía máis na presenza dun observador da Xunta dentro deste Consello de Administración que no cumprimento do Goberno socialista de todo aquilo que os nacionalistas galegos pactaron para investir como presidente a Pedro Sánchez”, indicou Tellado.
