Santiago, 24 de maio de 2017.- O Parlamento de Galicia aprobou hoxe, logo dunha transacción entre o Grupo Popular e o  Grupo Socialista, unha proposición non de lei a través da  que se pide ao Goberno central que realice cantas actuacións sexan precisas para que Venezuela cumpra os acordos vixentes entre ambos países e faga efectivo o pago das pensións. “Pensións ás que teñen dereito e necesitan con urxencia”, puntualizou a portavoz de Emigración, Raquel Arias.

Na súa intervención, Arias subliñou que a situación que se está a vivir en Venezuela “é dramática” e o estado no que se atopan os pensionistas, xa sexan emigrantes retornados ou venezolanos que residen en Galicia, “é de emerxencia”. Neste contexto, considerou “obrigado” que dende este Parlamento “traslademos a todos os venezolanos a nosa solidariedade”.

  AXUDAS TRANSITORIAS

Na iniciativa aprobada polo Parlamento tamén se solicita ao Goberno galego que, mentres non se resolve este problema, habilite axudas transitorias que, segundo explicou a deputada popular, permitan ós afectados “saír da situación de necesidade na que se atopan”.

Raquel Arias asegurou que a defensa dos galegos “sempre será o primeiro” para o PPdeG, con independencia do país do que se trate, “como xa demostramos aquí apoiando outras iniciativas que defendían os intereses dos nosos retornados que tiñan problemas coas súas cotizacións en Noruega ou Alemaña”. Neste sentido, afeou a actitude de En Marea e do BNG por negarse a “esixir explicacións” a Nicolás Maduro por todo o que está a acontecer no país venezolano.

CONTACTO DIRECTO E PERMANENTE

Arias Rodríguez puxo en valor o contacto “directo, permanente e dende o primeiro día” que mantivo a Xunta, a través da Secretaría Xeral de Emigración, coas autoridades españolas e venezolanas para facer seguimento da situación e axudar “no posible” aos galegos residente alí e aquí.

Con este obxectivo, segundo dixo, asináronse varios convenios de colaboración, tanto en Venezuela como en Galicia, con colectivos e asociacións que permitirán, por exemplo, no caso de Galicia, abrir sendas oficiñas en Vigo e Ourense, “onde residente a maioría dos afectados”, para asesoralos e axudalos en todo o que precisen.

A voceira de Emigración do Grupo Popular tamén destacou as axudas extraordinarias “xa habilitadas pola Xunta” para os retornados venezolanos, así como a modificación, por parte da Consellería de Política Social, dos criterios para a concesión das axudas de inclusión social.