O Pleno do Parlamento de Galicia expresou hoxe, a proposta do Grupo Popular pero co voto en contra do BNG e a abstención do PSdeG, o seu firme compromiso na defensa da Constitución de 1978 e dos valores democráticos que se ven reflectidos no seu artigo 1º, onde define a España como un Estado social e democrático de Dereito, que propugna como valores superiores do seu ordenamento xurídico a liberdade, a xustiza, a igualdade e o pluralismo político; así como na defensa da independencia do Poder Xudicial, o cal non pode ser usado como elemento de negociación mediante cesións esixidas por partidos independentistas para garantir a continuidade dun Goberno.
O deputado popular Adrián Pardo lamentou que “a pasada lexislatura estatal pasará á historia por ser a do ataque á separación de poderes”. Así, fixo un relato dalgúns dos ataques ao Poder Xudicial realizados en tres anos, como o nomeamento da exministra de Xustiza como Fiscal Xeral do Estado; o uso de prerrogativas excepcionais como os indultos para o beneficio político; o nomeamento de altos cargos do Goberno de Pedro Sánchez como maxistrados do Tribunal Constitucional; ou o ataque deliberado e recorrente á Xustiza española, “especialmente pola aplicación da Lei do si é si, chegando a chamar ‘fachas con toga’ aos xuíces por aplicar a nefasta lei que aprobaron e a propia ministra de Igualdade afirmou que os xuíces eran ‘machistas’”, concretou.
“Probablemente, esteamos ante o Presidente do Goberno de España con mellor concepto de si mesmo porque el non minte, cambia de opinión”, sinalou Adrián Pardo, quen lembrou varios “cambios de opinión” de Pedro Sánchez ao longo da pasada lexislatura: cando dixo que non ía indultar aos políticos promotores do referendo ilegal, cando dixo que nunca ía facer unha mesa bilateral Estado-Generalitat, cando dixo que nunca ía a rebaixar os delitos de sedición e de malversación ou cando dixo que nunca ía a ter como interlocutor a Puigdemont. “E non quero facer spoiler dos seus próximos cambios de opinión con respecto á amnistía e á autodeterminación”, engadiu.
TRITURAR OPINIÓNS
O deputado popular sinalou que “esta indignidade democrática non só é rexeitada pola meirande parte dos cidadáns españois, senón que tamén por grandes voces socialistas, como Felipe González, Alfonso Guerra, Odón Elorza, García Page ou Javier Lambán”. “O certo é que hoxe en día, para algúns estas persoas son vella garda, pero é que con esta máquina de triturar opinións que é o PSOE resulta vella garda calquera socialista que se quedase no argumentario socialista de hai tres meses”, matizou.
Respecto do BNG e da súa negativa a apoiar esta proposición non de lei, Adrián Pardo sinalou que “non me sorprende esta decisión dunha formación política que ten como socios a EH Bildu e a ERC, e que non lle importa nada a igualdade dos galegos co resto dos cidadáns españois”. Así, dixo que “dálles igual vivir na irrelevancia política e hoxe exemplificaron no Parlamento galego esa inutilidade para Galicia, confirmando que están máis preocupados pola amnistía do señor Puigdemot que pola defensa dos intereses dos galegos”.
