O Pleno do Parlamento de Galicia aprobou hoxe por unanimidade a proposición non de lei do Grupo Popular a través da que se reclama ao Goberno de España que cumpra o seu compromiso de axudar aos enfermos de esclerose lateral amiotrófica (ELA) e as súas familias.
“Galicia foi a primeira comunidade en crear o proceso asistencial integrado de ELA e en poñer a disposición das persoas enfermas de ELA unha axuda anual de 12.000 euros, pero lamentamos profundamente o desleixo do Goberno de Pedro Sánchez con estes enfermos bloqueando unha proposición de lei que se estaba a tramitar no Congreso despois de 49 prórrogas e máis de 400 días sen proceder á súa tramitación”, sinalou.
A deputada popular Rosalía López explicou que a esclerose lateral amoitrófica é a doenza neurodexenerativa máis frecuente despois do alzhéimer e enfermidade do parkinson. Neste momento, en España hai cerca de 4.000 persoas afectadas, detectando cada día unha media de tres novos casos.
ATENCIÓN MULTIDISCIPLINAR
“Estamos a falar que estes doentes precisan dunha atención multidisciplinar e de coidados especializados con carácter permanente, o que supón, na maior parte das ocasións, un esforzo persoal e económico moi importante para as persoas que teñen a enfermidade e as súas familias, a maior parte das veces absolutamente inasumible”, indicou.
Diante desta situación, a deputada popular lembrou que o Goberno de Pedro Sánchez comprometeuse no ano 2020 a axudar aos enfermos de ELA e ás súas familias, así como seguir traballando para mellorar o diagnóstico, o tratamento e a vida destas persoas e dos seus achegados.
“Despois de máis de tres anos, o Goberno central non fixo absolutamente nada, pero é que, ademais dilatou tanto no tempo unha proposición de lei, cuxa toma en consideración foi aprobada por unanimidade no Congreso en 2022, que rematou a lexislatura e decaeu, coa conseguinte desesperación e sentimento de impotencia de todas as persoas enfermas e das súas familias”, lamentou.
Entre outras cuestións, esta proposición de lei incluía o recoñecemento do 33 por cento do grao de discapacidade desde a diagnose da patoloxía; a atención preferente no recoñecemento do grao III de dependencia para que os doentes conten canto antes con recursos técnicos e humanos especializados; a posibilidade de acollerse ao bono social eléctrico; e o servicio domiciliario que garanta o acceso á atención fisioterapéutica, de terapia ocupacional e especializada as 24 horas do día.
RUTA SOCIOSANITARIA E AXUDA ECONÓMICA
Fronte a este desleixo por parte do Goberno central, Rosalía López salientou que a Xunta xa aprobou en 2018 o proceso asistencial integrado de ELA, “o primeiro de España e que permite aos enfermos dispoñer dunha ruta sociosanitaria para a mellor atención integral aos doentes”. En concreto, este proceso asistencial integrado define unha vía clínica de esclerose lateral amiotrófica en cada área sanitaria, que garante que unha persoa con sospeita de ELA conta cunha primeira consulta nos servizos de neuroloxía nos seguintes 15 días; establece tempos máximos recomendados para a realización de probas diagnósticas; adxudica a tarxeta dobre A para unha atención preferente aos enfermos de ELA; establece consultas hospitalarias multidisciplinares de acto único; e abre unha vía preferente para que as solicitudes de dependencia da ELA sexan tramitadas en menos dun mes.
“Ademais, desde o pasado mes de abril, os enfermos diagnosticados de ELA dispoñen dunhas axudas de 12.000 euros ao ano por persoa, situando a Galicia como a primeira comunidade autónoma en contar con este tipo de axudas directas e inmediatas”, sinalou a deputada popular. Ata o pasado mes de xuño, máis dun cento de persoas xa solicitaran estas axudas impulsadas pola Xunta.
