Santiago, 29 de setembro de 2021.- O Parlamento de Galicia aprobou hoxe a proposición non de lei do Grupo Popular a través da que se demanda ao Goberno de España, en coordinación coas administracións autonómicas e locais, a posta en marcha dun plan estatal contra a exclusión financeira, con medidas que faciliten o acceso á poboación aos servizos financeiros, especialmente na zona rural.
A deputada popular Sandra Vázquez criticou que “tanto o BNG como o PSdeG non apoiaran esta proposición non de lei e se descolgaran tamén da moción aprobada no Senado que instaba ao Goberno de España a elaborar un estudo e acordar un paquete de medidas globais para abordar este problema”.
A proposición non de lei inclúe, ademais, a solicitude para que o Goberno central, en colaboración co Banco de España e a Comisión Nacional do Mercado da Competencia (CNMC), elabore un estudo sobre a situación do mercado financeiro en España desde o punto de vista da concentración bancaria, da competencia e do acceso aos servizos financeiros, especialmente na zona rural, e as consecuencias no seu desenvolvemento económico e social.
“Mentres non se aprobe esta estratexia estatal de loita contra a exclusión financeira, consideramos necesario que a Xunta continúe impulsando, xunto coas administracións locais galegas e en colaboración coas entidades financeiras que operan en Galicia, medidas que faciliten o acceso da poboación aos servizos financeiros”, sinalou a deputada popular.
CONSECUENCIAS PARA OS CONCELLOS
Sandra Vázquez afirmou que “obstaculizar o acceso aos servizos financeiros aos habitantes dos concellos ten consecuencias directas no seu desenvolvemento económico e social, e, por suposto, na despoboación do seu territorio, que agrávase polas restricións nos servizos de atención presencial e outras medidas afectadas ante a situación actual da pandemia”.
“O noso obxectivo é garantir que toda a poboación galega, con independencia do seu lugar de residencia, teña acceso aos servizos bancarios e financeiros, evitando a súa exclusión financeira e prestando especial atención no ámbito rural”, subliñou Sandra Vázquez, quen lamentou que BNG e PSdeG non apoiaran esta proposta “e decidiran poñerse de lado ante os problemas que poden ter os galegos do rural para acceder aos servizos financeiros de xeito próximo e cómodo”.
A deputada popular lembrou que o proceso de concentración bancaria vivida en España a raíz da crise financeira de 2008 “permitiu reforzar a solvencia das entidades e recuperar a confianza e a estabilidade do sistema financeiro, que gañou en capacidade para resistir novas crises pero tamén trouxo alteracións negativas, como unha importante diminución do número de sucursais e oficinas bancarias abertas ao público”.
“O pasado ano pecháronse en España máis de 1.600 oficinas bancarias e este ano continúan os axustes”, concretou Sandra Vázquez, quen engadiu que “estes peches non só corresponden a Abanca, senón que se estenden por outras entidades financeiras como o Banco Santander, o BBVA, Caixabank, Unicaja, Ibercaja ou Banco Sabadell”.
