Santiago, 9 de febreiro de 2021.- “Galicia culmina coa nova Lei de residuos e solos contaminados un novo marco legal completamente adaptado á normativa comunitaria e que avanza cara un cambio de modelo baseado na economía circular e que está chamado a ser o único modelo de futuro posible”, afirmou a deputada popular Marta Nóvoa no debate de aprobación deste texto lexislativo celebrado hoxe no Pleno do Parlamento galego.
Na súa intervención, defendeu o modelo Sogama, que este ano chegará ao vertido técnico cero, “15 anos antes do establecido polo Parlamento Europeo para o conxunto dos estados membros”.
Marta Nóvoa salientou que “Galicia sempre estivo na vangarda das esixencias europeas en materia de residuos” e lembrou que xa no ano 2010 se deseñou o Plan de Xestión dos Residuos Urbanos de Galicia, pasando posteriormente pola aprobación en 2016 do Plan de Residuos Industriais, ata chegar ao 2019 coa implantación das Estratexias de Cambio Climático e Economía Circular.
POR DIANTE DA NORMATIVA BÁSICA ESTATAL
“Coa aprobación desta nova lei de residuos e solos contaminados de Galicia deixaremos atrás unha norma de hai 12 anos, nos que mudaron moito as cuestións relativas á xestión de residuos, e nos adiantamos á aprobación da normativa básica estatal, que tiña que estar aprobada desde o pasado mes de xullo e o único que hai na actualidade é un texto articulado que aínda non pasou polo Consello de Ministros”, sinalou.
A deputada popular fixo un repaso polas características máis importantes desta nova lei. En concreto, sobre a xestión de residuos, destacou que “se adianta en cinco anos o obxectivo de redución dos residuos producidos ao 15 por cento, marcando como obxectivo acadar en 2025 que un 55 por cento dos residuos téxtiles, de aparellos eléctricos e mobles se introduzan na cadea de reparación para a reutilización”.
O texto lexislativo tamén contempla o incremento progresivo da reutilización ou valorización material de residuos non perigosos de construción e demolición ata acadar o 75% no 2025 e fixa obxectivos de reciclaxe, apostando por impulsar a reciclaxe de residuos de envases coa meta de chegar ao 65 por cento en 2025.
No referente ao envío de residuos a vertedoiro, e igualando os obxectivos europeos, fixa que só se envíe a vertedoiro un 10 por cento da cantidade de residuos xerados. Neste sentido, Marta Nóvoa destacou que “en Galicia o modelo vertedoiro rematou logo de que se clausurara en 2013 o derradeiro vertedoiro municipal non autorizado existente, eliminándose máis de 1.000 puntos de vertido incontrolado na Comunidade galega”.
PRIORIDADE COS CONCELLOS
Nóvoa afirmou que “a colaboración, apoio e coordinación cos concellos, segue a ser unha prioridade, tendo presente que a xestión de residuos é unha competencia municipal”. Deste xeito, sinalou que “un dos principais puntos de colaboración entre Xunta e entidades locais continuará sendo a xestión dos biorresiduos, xa que os municipios deberán instaurar a recollida separada a finais de 2023”.
“Outro dos obxectivos básicos deste texto é reducir drasticamente o consumo de plásticos dun só uso”, dixo a deputada popular. Para isto, explicou que a nova lei prohibe a entrega gratuíta de bolsas de plástico e a venta de vaixelas de plástico ou dun só uso.
Outro dos obxectivos deste novo texto lexislativo é frear o desperdicio alimentario. Neste sentido, Marta Nóvoa sinalou que “debemos ser máis responsables cos nosos hábitos de compra, xa que un 42 por cento dos residuos alimentarios se xera no fogar” e para conseguir este obxectivo a lei establece que en 2025 deberá reducirse nun 30 por cento o volume de residuos de alimentos que xeramos respecto ao ano 2010.
Ademais, os titulares de establecementos de restauración estarán obrigados a entregar, se o cliente así o solicita, as fraccións sobrantes de alimentación non consumidas no local. “E deberán facelo en recipientes compostos nun 50 por cento de material biodegradable, nunca de plástico”, engadiu.
FORMACIÓN E EDUCACIÓN AMBIENTAL
Marta Nóvoa afirmou que “é necesaria a formación e a educación ambiental, xa que potenciará que o consumo de materias primas e produtos se realice desde unha óptica cada vez máis responsable”. “De feito, a lei aposta por impulsar que os máis novos actúen de catalizadores para un futuro mellor, ao tempo que aposta por unha administración sostible e respectuosa co medio ambiente, incluíndo medidas como o emprego de enerxías verdes e o impulso á denominada contratación pública verde”.
Por último, a deputada popular referiuse á contaminación de solos e concretou que esta lei “pon o seu foco na prevención da contaminación dos solos”. Así, establécese que os solos deberán conservar as súas funcións naturais ao máximo e deberán recuperarse usando as mellores técnicas dispoñibles, priorizando sempre os tratamentos de recuperación in situ.
