21 de marzo de 2023. O Parlamento de Galicia aprobou hoxe a proposición non de lei do Grupo Popular a través da que se demanda ao Goberno central unha alternativa ao PERTE do téxtil que aparcou sen explicacións e pese á vontade de todo o sector, capaz de garantir investimentos estratéxicos tanto para a industria de Galicia como para o conxunto da economía galega.
Así mesmo, pídese que cumpra o seu compromiso de garantir o financiamento necesario con fondos europeos Next Generation para implantar a fábrica de fibras téxtiles de Altri no concello lucense de Palas de Rei.
A portavoz popular de Industria, Cristina Sanz, destacou “a indubidable importancia do sector téxtil en Galicia, que lidera a xeración de riqueza, aportando o 22,85 por cento do valor engadido bruto; emprega a máis de 42.000 persoas, onde máis de 76 por cento é emprego feminino; e conta con 928 empresas”.
CAMBIO NO XEITO DE TRABALLAR
“As empresas do téxtil están firmemente comprometidas coa necesidade de cambio no xeito de traballar e son conscientes de que os consumidores demandan produtos cada vez máis sostibles”, manifestou. Diante deste escenario, Cristina Sanz indicou que os fondos Next Generation “configúranse como unha fiestra de oportunidade histórica para afrontar a transformación e o futuro do téxtil, nun escenario marcado pola saída da pandemia, a invasión rusa de Ucraína, o encarecemento dos custos de produción e polas perspectivas de desaceleración”.
Na súa intervención, a portavoz popular lembrou que “hai pouco máis de un ano todo o sector unía as súas forzas para presentar un proxecto coa intención de que se aprobara un PERTE específico para o téxtil, que servise para impulsar a súa reindustrialización e traer produción de volta a España”. En concreto, este PERTE tiña por obxectivo lograr investimentos por un valor de entre 11.000 e 12.000 millóns de euros mediante a colaboración público-privada.
“Lamentablemente, o Goberno de Pedro Sánchez decidiu, sen previo aviso, aparcar este PERTE e como única alternativa ofreceu a participación desta industria no PERTE de economía circular, onde introduciu unha pequena partida específica para o téxtil de 100 millóns de euros, que aínda non ten convocado”, dixo Cristina Sanz, quen subliñou que “estamos ante unha mostra máis da distribución dos fondos europeos que Moncloa intentou acaparar para si, e caracterizada pola lentitude e a falta de transparencia”.
EN RISCO O PROXECTO DE ALTRI
Sanz sinalou que “unha das consecuencias máis inmediatas desta decisión do Goberno de Pedro Sánchez é que está poñendo en risco un dos principais proxectos transformadores de Galicia: o de Altri en Palas de Rei”. “Un proxecto de economía circular, cun investimento de 800 millóns de euros e que esixe plena colaboración de todas as administracións para que se leve adiante coas máximas garantías: o Goberno central apoiando con fondos europeos, a Xunta, axudando na tramitación administrativa; e o Concello de Palas de Rei, desenvolvendo a iniciativa”, apuntou.
Con esta falta de decisión, “están a poñer en risco 2.500 empregos vinculados a este proxecto e a posibilidade de abastecer de materia prima sostible ao sector téxtil, co produción de 200.000 toneladas ao ano de lyocell reciclando roupa e utilizando madeira dos bosques galegos”, dixo a portavoz popular.
“Altri quere executar o seu proxecto en Galicia, pero se está encontrando con que o Goberno de Pedro Sánchez non aproba o PERTE específico para o sector téxtil no que encaixaría”, asegurou Cristina Sanz, quen engadiu que “a única alternativa de financiamento que se lle ofrece a Altri é fraccionar o proxecto en 17 miniproxectos para presentar en diferentes PERTEs”.
