Santiago, 17 de xaneiro de 2020.- O Parlamento de Galicia aprobou hoxe a proposición non de lei do Grupo Popular a través da que se demanda ao Goberno central que modifique o Real Decreto de Ordenación Pesqueira de xeito que se considere a posibilidade de poder rexistrar e empregar como auxiliares de 4ª lista os buques que se utilizan para o marisqueo ou a extracción de recursos específicos coma o percebe, algas, ourizos, a similitude dos buques auxiliares de coral, empregados de facto para achegar aos pescadores alí onde se encontra o recurso.

A portavoz do Mar, Teresa Egerique, sinalou que “o exercicio de marisqueo a flota esixe de faenar en zonas de escaso calado, o que impide que moitas veces poidan acceder cos barcos, facendo recomendable o uso de outras embarcacións de menor porte”. Deste xeito, considerou que a iniciativa aprobada hoxe “é unha reivindicación xusta que busca garantir o traballo destes mariscadores nunhas condicións de maior certeza, fiabilidade e operatividade”.

TRABALLO FEITO EN GALICIA

Na súa intervención, Egerique lembrou que “en Galicia veuse traballando, desde a colaboración entre o sector marítimo-pesqueiro e Consellería do Mar, nunha modificación da normativa que permitise flexibilizar tanto a regularización das embarcacións cuxos datos non coincidían cos do seu rexistro como de obter maior adecuación nas súas disposicións de potencia ou arqueo de cara a efectuar as súas tarefas marisqueiras ou pesqueiras”.

“Desde hai anos o sector ven reclamando unha revisión da potencia dos motores das embarcacións pesqueiras dedicadas á captura de percebe e a outros recursos específicos, como algas, ourizos, navallas ou poliquetos, co obxectivo de adaptalos á realidade da frota e da actividade que realizan, pois consideran que a escala actual non se corresponde coas súas necesidades laborais”, apuntou.

COMPROMISO DO GOBERNO CENTRAL

Teresa Egerique afirmou que, diante desta demanda, a Consellería do Mar “mediou ante a Secretaria Xeral de Pesca e a Dirección Xeral da Marina Mercante para intentar habilitar unha lista específica que contemplase as embarcacións que faenan a marisqueo ou a recursos específicos, ou que permita integralas na cuarta lista, co obxectivo de buscar unha solución para estes barcos que contan cunha estrita limitación de potencia”.

Froito desta demanda, o Goberno central comprometeuse a dar os pasos que permitan resolver esta situación mediante un Real Decreto que modificase a normativa que impide esta posibilidade de incorporación das embarcacións na cuarta lista, “polo que neste momento a Xunta está á espera de que o Estado dea os pasos necesarios neste sentido”.