4 de novembro de 2022. O Parlamento de Galicia aprobou hoxe a proposición non de lei a través da que se insta á Xunta a coordinar, xunto ás principais institucións académicas galegas, nomeadamente a Real Academia Galega, unha programación de actividades que difundan os valores contidos na vida e obra de Manuel Murguía, así como o coñecemento da etapa histórica e circunstancias socio-culturais do seu tempo, no centenario do seu pasamento.

O deputado popular Carlos Gómez considerou que “o centenario do pasamento deste intelectual galego, clave para asentar as bases do pensamento galeguista, é unha boa oportunidade para traer a súa figura ao presente para seguir afondando no seu coñecemento entre os galegos e galegas, especialmente entre os máis novos”.

“Murguía foi un intelectual de relevancia que hoxe nos axuda a entender a conformación da identidade de Galicia; un persoeiro con iniciativa e proactividade que ideou, xunto a outros escritores e escritoras, o proxecto de crear a Academia da Lingua; unha figura moi relevante na divulgación da obra de Rosalía de Castro, como compilador e divulgador da súa obra; e un investigador comprometido, con numerosos ensaios e publicacións ás súas costas que o converten nun autor prolífico, que tivo un papel fundamental no asentamento das bases do pensamento galeguista que todos compartimos”, sinalou.

Neste sentido, afirmou que a Xunta, “como o nivel administrativo máis próximo e común a todos os galegos e galegas, é a institución máis indicada para coordinar esta efeméride, pola solemnidade e relevancia que teñen para Galicia”. Ademais, avogou pola colaboración nas actividades desta celebración coa Real Academia Galega, “coa que a Xunta comparte o mesmo obxectivo de traballar a favor da defensa e difusión da lingua e a cultura galega”.