O Parlamento de Galicia aprobou hoxe dúas iniciativas do Grupo Parlamentario Popular nas que se reclama ao Goberno central un incremento substancial do apoio e a protección para o sector marítimo-pesqueiro, incidindo especificamente nas demandas das mariscadoras e das confrarías de pescadores de Galicia.
A través destas propostas, os populares instan ao Executivo estatal a adoptar medidas urxentes e eficaces que vaian máis alá de promesas incumpridas e que garantan a viabilidade económica dun sector estratéxico para miles de familias na costa galega.
EXENCIÓN DO 100% DAS COTAS PARA AS MARISCADORAS
A deputada popular Nazareth Cendán incidiu na urxente necesidade de protexer ás profesionais do marisqueo –maioritariamente mulleres- que, tras a suspensión de forma temporal da súa actividade por causas alleas a elas, seguiron efectuando o pago íntegro das cotas mensuais á Seguridade Social.
Para a parlamentaria popular, resulta incomprensible e de evidente desigualdade que estas profesionais, por motivos totalmente alleos á súa vontade como os temporais ou a mortaldade do bivalvo, teñan que afrontar o pago íntegro das cotas sen xerar un só euro. Tal e como explicou, esta falta de protección ante causas de parálise de actividade “é responsable única e exclusiva do Goberno de Pedro Sánchez”.
Neste senso, cualificou de inexplicable o bloqueo que o Executivo central teña paralizada a tramitación parlamentaria do proxecto de lei co que se comprometera a exención destas taxas, acumulando sucesivas ampliacións nos prazos de emendas. “É incomprensible e inasumible que o Goberno de Pedro Sánchez mire cara a outro lado, mentres segue asfixiando a quen non pode faenar”, denunciou.
Por iso, a iniciativa, que foi aprobada por unanimidade, insta á Xunta a esixir ao Instituto Social da Mariña a aprobación inmediata dunha exención extraordinaria do 100 % nas cotas para as mariscadoras afectadas por estas paradas que non conten coa protección por cese de actividade. Unha medida que, segundo reclamou Cendán, debe garantir o mantemento da alta no Réxime Especial do Mar e recoñecer os períodos como cotizados con carácter retroactivo.
“Esta iniciativa pide que as nosas mariscadoras sexan tratadas coa mesma xustiza coa que se tratou a outros sectores en situacións de forza maior e pide que o Goberno de España cumpra as súas obrigas legais e constitucionais, xa que a competencia en materia de Seguridade Social é exclusivamente estatal”, sentenciou.
AXUDAS ESPECÍFICAS PARA AS CONFRARÍAS GALEGAS
Pola súa banda, a deputada popular Dolores Hermelo defendeu a segunda das iniciativas –que saíu adiante sen votos en contra– para pedir “máis apoio efectivo” ás 63 confrarías de pescadores de Galicia –que representan o 28% de todo o Estado-, cuxo bo funcionamento garante o futuro de miles de postos de traballo. Hermelo alertou do impacto que a falta de persoal nas Capitanías Marítimas e a plena aplicación do Regulamento de Ordenación da Navegación Marítima están a provocar no sector ao xeneralizarse os despachos e roles electrónicos.
A parlamentaria popular explicou que este proceso derivou nunha externalización de tarefas administrativas estatais cara ás confrarías galegas, que agora actúan como intermediarias en contratos, enrolamentos e xestións dixitais sen recibir recursos a cambio. Segundo advertu, estase producindo un desprazamento efectivo da carga de traballo desde as Capitanías cara ás confrarías, o que está a supor un sobreesforzo de xestión e responsabilidade para unhas entidades que non teñen por que suplir as carencias de persoal e medios da Administración do Estado. “Non se lles pode cargar de tarefas e de responsabilidades que non lle corresponden como propias”, dixo.
Por este motivo, os populares instan á Xunta a demandar ao Goberno de España a posta a dispor, con carácter inmediato, dunha “liña específica de axudas compensatorias destinada ás Confrarías de Pescadores e ás súas Federacións que compense as funcións que complementan ao Estado, corrixa a asfixia administrativa e garanta unha resposta áxil e próxima para todos os profesionais do mar.
