Santiago, 8 de marzo de 2017.- O Parlamento de Galicia aprobou esta mañá unha proposición non de lei, a iniciativa do Grupo Popular, a través da que se insta á Xunta a darlle continuidade á autovía da Costa da Morte, comezando por unha primeira fase que conecte Baio e a estrada AC-432 en Vimianzo, en dirección a Camariñas. A proposta recolle que este mesmo ano se avance na redacción do proxecto construtivo e se dispoñan as anualidades necesarias nos orzamentos para que esta infraestrutura sexa unha realidade nesta lexislatura. Así mesmo, e logo dunha transacción do Grupo Socialista, incorporouse á proposición non de lei que a Xunta analice a viabilidade de incorporar un enlace co polígono industrial de Vimianzo.
O deputado do Grupo Popular Aurelio Núñez Centeno salientou “o esforzo do actual Goberno galego para poñer en servizo o pasado mes de xullo 25 quilómetros de autovía da Costa da Morte, entre Carballo e Baio, totalmente libres de peaxe para os usuarios”. “Esta nova infraestrutura representou unha transformación nas comunicacións dos concellos da Costa da Morte, comarca na que habitan 120.000 persoas, incidindo na mellora da súa calidade de vida, e do seu benestar”, apuntou.
“A Xunta de Galicia apostou pola eficiencia, e por facer o treito co maior volume de tráfico e de maior lonxitude, coa vontade de cumprir coa Costa da Morte, para incrementar a competitividade dos seus emprendedores, a súa seguridade viaria, e a calidade de vida dos veciños e veciñas da comarca”, manifestou Aurelio Núñez, quen engadiu que a autovía “está aí a pesar de todas as dificultades técnicas e económicas que formulou a súa construción, e a pesar das dificultades políticas que se puxeron por parte dos grupos da oposición”.
Núñez Centeno afirmou que o Goberno da Xunta “ten comprometida a continuación desta autovía, e vaise executar por vía orzamentaria e en distintas fases”. Neste sentido, explicou que “esta decisión de acometer a obra pola vía orzamentaria, e non recorrer ao modelo concesional, é a garantía máxima da realidade da súa construción, evitando os problemas ocorridos no pasado, que retrasaron dabondo o primeiro treito”.
COMPROMISO DO GOBERNO
En concreto, lembrou que “os orzamentos da Xunta para o presente ano 2017 reflicten o compromiso do goberno do PP con esta infraestrutura e con estas comarcas, contemplando unha partida de 250.000 euros necesaria para redactar o proxecto construtivo do treito entre Baio e a AC-432 no concello de Vimianzo, que une o núcleo con Camariñas”.
“Queremos que esta obra se faga con realismo e total responsabilidade cos orzamentos públicos, convertendo unha promesa electoral nunha infraestrutura útil para as persoas; con seriedade, sen repetir erros do pasado e con compromiso de prazos axeitado á realidade”, sinalou o deputado popular.
