Santiago, 6 de setembro de 2022.- O Pleno do Parlamento de Galicia da vindeira semana procederá á aprobación definitiva do Plan Estratéxico de Galicia 2022-2030, un documento “ambicioso, vivo e moi útil non só pola transparencia e información que aporta, senón tamén porque deixa claro que temos obxectivos de país e establece o camiño para acadalos”, salientou o portavoz do Grupo Popular, Pedro Puy.

Así mesmo, o Grupo Popular demandará o apoio da Cámara galega ao manifesto, respaldado por sete gobernos autonómicos e o Congreso dos Deputados, para a toma de medidas estatais urxentes en materia de atención primaria; así como solicitará ao Goberno central medidas que permitan a viabilidade da industria electrointensiva e avanzar na tramitación do PERTE para a descarbonización deste sector industrial.

Pedro Puy explicou que o Plan Estratéxico de Galicia 2022-2030 “establece os obxectivos de país no ámbito da gobernanza e reflicte a vontade de facer política de longo prazo por parte do Goberno galego”. Neste sentido, lembrou que a elaboración deste plan contou coa participación non só de técnicos da Administración galega, senón tamén expertos e a implicación da sociedade galega. O seu contido está distribuído en cinco eixes transversais (reto demográfico; Galicia verde e sostible; competitividade e crecemento; cohesión social e territorial; e gobernanza) e fixa dez metas prioritarias, entre as que destaca a de acadar de aquí ao ano 2030 a práctica converxencia con España en termos de renda bruta dispoñible e superar o 90% do PIB per cápita da Unión Europea

O portavoz popular avanzou que “ao longo desta semana intentaremos achegar aos grupos da oposición as propostas de transacción que se debaterán na sesión plenaria, coa vontade de atopar puntos en común sobre o futuro de Galicia e cara onde deben camiñar as políticas públicas”.

A orde do día da sesión plenaria inclúe, ademais, a comparecencia do conselleiro de Educación, a petición propia e do BNG, para informar sobre o inicio do curso escolar.

ATENCIÓN PRIMARIA E ELECTROINTENSIVAS

Dentro do apartado de proposicións non de lei, o Grupo Popular solicitará o apoio do Parlamento galego ao manifesto apoiado por sete comunidades autónomas e o Congreso dos Deputados para a toma de medidas estatais urxentes en materia de atención primaria, así como demandar ao Goberno de España o cumprimento deste mandato parlamentario.

Puy lamentou que, a pesar de que no último Debate sobre o Estado da Nación se aprobara unha resolución respaldando este manifesto, o Goberno de España non teña expresado a súa intención de dar cumprimento a este acordo nos Consellos Interterritoriais celebrados ata a data.

En segundo lugar, o Grupo Popular demandará no Pleno que o Goberno de España manteña un diálogo aberto coas comunidades autónomas para identificar as medidas necesarias que permitan dar viabilidade á industria electrointensiva, tomando como exemplo os plans autorizados pola Comisión Europea a outros estados membros.

Así mesmo, pídese que avance na tramitación do PERTE anunciado para a descarbonización da industria electrointensiva, ao tempo que deseña mecanismos de colaboración análogos ao asinado con ArcelorMittal co fin de apoiar o futuro da planta de Alcoa en San Cibrao.