Santiago, 5 de setembro de 2017.- O Pleno do Parlamento galego iniciará a vindeira semana a tramitación da proposición de lei, impulsada polo Grupo Popular en colaboración co Goberno galego, para a implantación empresarial en Galicia co debate de totalidade deste texto lexislativo. O portavoz popular, Pedro Puy, tamén avanzou que na mesma sesión plenaria o PPdeG defenderá a introdución do cheque formación en Galicia e solicitar ao Ministerio de Xustiza que, canto antes, estableza o número de xulgados que lle corresponden á Comunidade galega en 2018.
Puy explicou que os seis asuntos incorporados polo Goberno galego e o Grupo Popular no Pleno “dan conta da nosa preocupación prioritaria pola creación de emprego e a mellora dos servizos sociais”. Ao mesmo tempo, reiterou que “o 80 por cento das iniciativas son a proposta dos grupos da oposición, o que volve demostrar que o traballo parlamentario facilita o control e o impulso ao Goberno galego”.
IMPLANTACIÓN EMPRESARIAL
Así, explicou que a proposición de lei de implantación empresarial ten como obxectivo principal “mellorar a implantación empresarial en Galicia para promover un emprego de maior calidade”. En concreto, sinalou que introducirá “enormes avances na capacidade dos empresarios para instalarse en Galicia, simplificando todos os trámites administrativos para a súa localización na Comunidade galega”.
O portavoz popular sinalou que na mesma liña de fomento do emprego en Galicia seguirá a comparecencia do conselleiro de Economía e Industria. En concreto, falará da Estratexia Autónomo 2020, que estará dotada ao longo desta lexislatura con 160 millóns de euros e se prevé beneficiará a máis de 10.000 autónomos cada ano.
“Se trata de apoiar o establecemento como autónomo e a contratación indefinida polos autónomos de persoas en Galicia”, explicou Pedro Puy, facilitando mellores condicions laborais e priorizando a incorporación ao mercado laboral dos menores de 30 anos.
CHEQUE FORMACIÓN E XULGADOS
O Grupo Popular defenderá na sesión plenaria dúas proposicións non de lei. A primeira ten como obxectivo que a Xunta introduza o cheque formación, para que as persoas traballadoras desempregadas dispoñan dun crédito de formación, escollan a formación que queren recibir e a entidade na que queren que se imparta. Puy sinalou que esta iniciativa busca que “os traballadores teñan unha boa formación e que esta estea relacionada coas demandas do tecido produtivo local”.
En segundo lugar, o Grupo Popular demandará ao Ministerio de Xustiza que estableza, canto antes, o número de xulgados que lle corresponden a Galicia para 2018, de xeito que a Xunta asuma, apoie e dote de medios a todos estes xulgados.
No apartado de preguntas ao Goberno galego, o Grupo Popular cuestionará sobre o número de consultas especializadas que se teñen implementado nos hospitais comarcais desde a posta en marcha das estruturas organizativas de xestión integrada do Sergas; as novidades e medidas específicas que a Xunta levará a cabo para o desenvolvemento da nova estratexia galega de linguas estranxeiras EDUlungüe 2020; e as conclusións do informe sobre os botiquíns necesarios nas embarcacións pesqueiras.
