A deputada do Partido Popular no Congreso pola provincia da Coruña, Tristana Moraleja, anunciou hoxe que a súa formación vén de esixir ao Gobierno Central que aclare se ten pensado retirar ou non o borrador do mapa concesional de transporte que deixaría sen parada a 22 concellos de Galicia.
A popular lembra que dende o seu partido xa presentaron fai semanas unha proposición non de lei (PNL) que foi aprobada (a favor PP, en contra Vox, Junts, Bildu e abstención PSOE e Sumar) para pedir a modificación dun plan que, explicou, supón unha “redución drástica” na prestación do servizo de transporte, debido a que só se teñen en conta criterios económicos.
Neste sentido, a popular explicou que, de saír adiante, o proxecto do Goberno deixaría sen parada en Galicia aos concellos de Arzúa, Melide, Chantada, O Corgo, Guitiriz, Baralla, Meira, Monterroso, As Nogais, Palas de Rei, Quiroga, A Pontenova, Trasmiras, A Mezquita, Ribadavia, Rios, A Rúa, Forcarei, Lalín, Tui, Silleda e O Porriño, que suman máis de 130.000 habitantes; eliminando 87 paradas nas catro provincias.
“O mapa é totalmente contraditorio a un dos piares da lei, como é a cohesión social. Vai en contra do citado principio despois de que vén establecer un servizo de transportes máis directo, con conexións unicamente cos grandes nodos de poboación, deixando fóra ás contornas rurais”, indicou Moraleja, quen incidiu en que esta situación choca de cheo coa realidade dos territorios do mundo rural con ampla dispersión e afectados polo reto demográfico.
“Queremos saber dunha vez por todas se o Goberno vai elaborar unha nova proposta de mapa concesional estatal que teña en conta as características específicas da provincia da Coruña e se, para iso, vai convocar, con carácter previo e urxente, a Conferencia Sectorial de Trasporte, tal e como se aprobou no Congreso”, apuntou a popular.
Moraleja subliña que o Goberno de España non pode pretender impoñer o mapa concesional –a proposición foi aprobada no Congreso e polo tanto o executivo ten que retirar a proposta- sen antes abordar o asunto no seo da Conferencia Sectorial dado que “estamos a falar dunha cuestión que nos afecta en conxunto e tamén á mobilidade do territorio”.
UN MAPA FUNDAMENTAL
Os populares lembran que resulta “fundamental e clave estratexicamente” o mantemento e a mellora do Servizo de Transportes Colectivo do Autobús como ferramenta de cohesión social dada a súa relevancia para os usuarios con menor renda e para a España rural.
Así mesmo, defenden, apuntou Moraleja, a elaboración do mapa en colaboración coas CCAA para que se teña en conta os criterios sociais, xeográficos e demográficos particulares de cada territorio, por encima de criterios meramente económicos.
