Santiago, 12 de abril de 2022.- “O plan de control de vertidos da Xunta serve para identificar e lograr que se emenden os puntos de vertido que se producen ao dominio público hidráulico, poñendo especial atención nas rías pero seguindo tamén todos e cada un dos ríos. Cumpre a súa función e está dando bos resultados”.

Nesta afirmación baseouse esta mañá o deputado do Grupo Popular Diego Calvo para rebater unha proposta dos socialistas galegos no Parlamento encamiñada a solicitar ao Goberno galego o deseño dun plan para eliminar a contaminación no río Xuvia en Narón.

Así, Calvo afeou aos socialistas que utilizaran o Parlamento galego para tratar de enganar aos cidadáns formulando peticións sobre cuestións que xa está a realizar a Xunta dende hai anos, pois o plan de vertidos vixente data de 2009.

CONCELLOS, ADMINISTRACIÓNS COMPETENTES

Durante o debate, o deputado popular lembrou que a maioría dos vertidos proveñen das redes de saneamento municipais, responsabilidade dos concellos, e que é a Xunta quen advirte de posibles incumprimentos para a súa emenda e, se é o caso, ábrese o expediente sancionar correspondente para corrixir a situación.

“Os concellos son as administracións competentes para levar a cabo o correcto saneamento das augas residuais e domésticas. Son eles os que teñen que controlar o que chega ás súas redes de sumidoiros ou depuradoras a través das ordenanzas de vertido e velar porque se cumpran esas directrices”, aseverou Calvo, que insistiu en que “non se pode descargar sobre a Xunta unha competencia que non é súa”.

Ademais destas cuestións, Diego Calvo lembrou que, ao igual que a Xunta asume competencias municipais para axudar aos concellos, non sucede o mesmo con outras administracións, en referencia directa á “escasa ou nula” colaboración das deputacións provinciais gobernadas polo PSOE e mesmo do Estado. “Todas as administracións son responsables de garantir a compatibilidade da actividade humana coa sustentabilidade ambiental”, matizou o deputado popular.

No caso concreto do río Xuvia, explicou que nos últimos cinco anos a Xunta contabilizou unha vintena de vertidos, e que só dous foron catalogados como contaminantes, o que significa que “o plan de control da Xunta funciona e que non é o mesmo un vertido controlado e autorizado que un vertido contaminante”.

APOIO Á LEI DE MELLORA DO CICLO DA AUGA

En canto ás melloras que solicitaron os grupos da oposición para a xestión e control dos vertidos, Diego Calvo lembroulles que teñen a súa disposición o instrumento idóneo para conseguilo, que é a Lei de mellora do ciclo integral da auga, xa en tramitación parlamentaria.

“A profesionalización da xestión integral do ciclo da auga é o mellor camiño para controlar e erradicar os vertidos”, matizou o popular, que explicou que esta Lei persegue, entre outros obxectivos, que unha xestión eficiente e eficaz da rede de colectores e dos sistemas de depuración contribúa a reducir e eliminar os vertidos contaminantes.