Santiago, 21 de decembro de 2020.- A viceportavoz do Grupo Popular, Paula Prado, afirmou hoxe no Parlamento que o proxecto de Lei de medidas fiscais e administrativas “intensifica as políticas de igualdade, reduce a presión fiscal aos sectores máis castigados pola crise, modifica a lexislación que mellora a execución das políticas forestais e do medio rural, e resolve problemas e dificultades nos expedientes administrativos”.

Paula Prado reivindicou “o traballo das persoas que estamos en política, porque estamos para resolver problemas á cidadanía e non para xerar problemas onde non os hai ou xerar desconfianza nun texto lexislativo que nada oculta, porque hoxe o estamos debatendo nesta sesión plenaria e queda por diante todo o percorrido en ponencia e comisión”.

HIPOCRISÍA DA OPOSICIÓN

Na súa intervención, lamentou a “hipocrisía” dos grupos da oposición porque “critican no Parlamento galego a lexitimidade da Lei de medidas como ferramenta lexislativa para modificar determinadas leis, cando están a tramitar nas Cortes unha Lei de acompañamento aos orzamentos do Estado que modifica 34 textos lexislativos de todo tipo, que nin son materia orzamentaria nin gardan relación coa política económica do Goberno”.

“Non vale apoiar unha norma cuestionada polos letrados do Congreso porque a presenta o PSOE e criticar unha norma sen obxeccións xurídicas no Parlamento de Galicia porque a presenta o PPdeG”, indicou a viceportavoz popular.

Prado cuestionou aos grupos da oposición se “non lles gusta esta lei porque establece exencións de taxas e bonificacións fiscais para os sectores máis castigados pola crise; porque establece medidas de conciliación para o persoal público; porque se amplían os beneficios por maternidade, adopción e lactancia para o persoal público; porque se regula o dispositivo que recoñece ás empresas a certificación galega de excelencia en igualdade; ou porque favorece a inserción das mulleres no mundo laboral, reduce a fenda salarial e potencia o cumprimento dos plans de igualdade polas empresas para evitar a discriminación por razón de xénero”.

Ademais, a viceportavoz popular engadiu que esta nova lei “establece medidas para fortalecer os sistemas de prevención de incendios; despexa dúbidas en relación ao dereito da gratuidade da educación infantil para o segundo fillo; e incorpora medidas de protección aos empregados públicos que sexan vítimas de terrorismo”.