O presidente do PPdeG, Alfonso Rueda, anuncia a aposta popular para que “sendo o partido con máis rexedoras de toda Galicia e con máis maiorías absolutas, en 2027 sería un enorme éxito ter máis candidatas e, tralas eleccións municipais, máis alcaldesas”.
Así o manifestou na clausura do acto ‘Mulleres que Gobernan’, organizado polo PPdeG en Ribeira para conmemorar o 8M, Día da Muller. Precisamente, neste concello elixiuse o pasado mes de outubro como nova alcaldesa á popular María Sampedro, á que Rueda aproveitou para darlle os parabéns, converténdose así na muller número 31 de rexedoras do partido.
“Imos traballar para obter máis candidatas e máis alcaldesas, sería un magnífico síntoma de como funcionamos no PPdeG, o partido que máis se parece a Galicia, porque damos oportunidades a quen as merece e cremos na igualdade como base dunha sociedade, sen consignas, con traballo”, reivindicou Rueda.
No “encargo” ás mulleres do partido para obter máis representación feminina de cara ao 2027, fixo un guiño á rexedora de Boborás, Patricia Torres: “O seu 87% de apoio está aí para quen o queira superar”.
Ademais, quixo amosar o seu “orgullo e apoio” ás mulleres da formación no seu conxunto, dende as que ocupan cargos de responsabilidade máis elevados como as “centos de concelleiras que traballan a diario, porque se lle vai ben ás políticas do PPdeG, vaille ben a Galicia”. Así, agradeceu o labor de “mulleres con principios, traballadoras e enérxicas”, dende a secretaria xeral, Paula Prado, pasando por conselleiras como Fabiola García e o resto de mulleres con representación no Goberno galego ou nas diferentes cámaras.
“Se este partido é grande é porque hai moitas mulleres que o facedes grande”, dixo o presidente dos populares galegos, en contraposición “cos que nos queren dar leccións, pontifican e son campións e campioas de todo”.
AS LECCIÓNS DO PSOE E O BNG
Así, foi moi crítico co PSOE e co BNG, asegurando que o legado que deixarán vai na liña de que “deixaron centos de agresores sexuais na rúa, non foron capaces de protexer ás mulleres tendo cartos para iso pero sen saber facelo e dando leccións cando teñen querelas e casos de acoso sexual”.
Pola contra, no PPdeG “somos máis de facer camiño, conseguindo leis pioneiras en igualdade de oportunidades dende hai tempo, dende os tempos de Manuel Fraga”. Referiuse tamén ás medidas actuais impulsadas polo Goberno galego, destinadas a mellorar a conciliación ou a presenza de mulleres en cargos nos que aínda hai desequilibrio. Neste sentido, tamén tivo palabras para todas aquelas “precursoras”, que cando “todo era aínda máis difícil, estabades aí, conseguindo apoios masivos”.
“Isto non consiste en enfrontarse a ninguén, vai no día a día. E somos conscientes de que hai moitísimas mulleres que mereciades destacar máis e agora ímolo conseguindo, sendo unha tarefa inacabada pero pola que seguiremos traballando”, sinalou Rueda.
UN ACTO POLAS “MULLERES QUE GOBERNAN”
Ribeira foi o epicentro da conmemoración do 8M do PPdeG e a alcaldesa, María Sampedro, fixo de anfitrioa do evento, no que tamén participaron a secretaria xeral do PPdeG, Paula Prado, a responsable de Política Social e Igualdade do Goberno galego, Fabiola García, así como numerosas alcaldesas e exalcaldesas de toda Galicia, deputadas autonómicas e nacionais e senadoras.
Houbo dúas mesas redondas: unha de exalcaldesas, moderada por Fabiola García, na que participaron Teresa Villaverde (Lousame), María José Gómez (Guntín), Carmen Leyte (Cartelle) e Luisa Piñeiro (Moraña); e outra mesa de alcaldesas actuais, moderada por Paula Prado, con Fina Suárez (Trazo), Mariña Gueimunde (Viveiro), Patricia Torres (Boborás) e Cristina Correa (Oia). As mulleres do PPdeG explicaron as súas experiencias persoais á fronte de gobernos en Galicia, así como numerosas anécdotas do seu paso pola política, e ao remate fíxoselles entrega dun agasallo conmemorativo.
